Улирлын томуу, томуугийн цар тахлын хүндрэлийн үнэлгээгээр Нийслэл болон Архангай, Баян-Өлгий, Өвөрхангай, Өмнөговь, Төв аймагт өвчлөл “Алаг цоог дэгдэлт”-ийн түвшинд хүрээд байна. Харин 13 аймагт идэвхжил үргэлжилж байгаа бол хоёр аймагт “Улирал хооронд”-ын түвшинд байна. 47-р долоо хоногийн шинжилгээгээр томуу, томуу төст өвчний үүсгэгчийн 60.5 хувийг А(H3N2) вирус эзэлж байгаа бөгөөд уг вирусийн бүрэн геномын дарааллыг тогтоох үеэр subclade K дэд хэв шинж илэрсэн байна. Энэхүү дэд хэв шинж нь хүүхдэд илүү өндөр эрсдэлтэй өвчлөл үүсгэдэг гэдгээрээ онцлог юм.
Томуу, томуу төст өвчний дэгдэлтийн оргил үе энэ жил 51 дэх долоо хоногт, өөрөөр хэлбэл сурагчдын амралт эхэлсний дараа тохиох хандлагатай байна. Үүнтэй холбоотойгоор хүндрэл ихтэй өвчлөл өргөн хүрээтэй тархах эрсдэл нэмэгдэж байгаа тул тархалтыг сааруулах зорилгоор ЕБС-ийн сурагчдын өвлийн амралтыг хоёр долоо хоногоор урагшлуулах саналыг мэргэжлийн байгууллагууд гаргажээ. 2017/2018–2024/2025 оны томуу, томуу төст өвчний хөдлөл зүйг ЕБС-ийн амралтын хуваарьтай харьцуулсан судалгаагаар амралтыг 14 хоногоор наашлуулсан тохиолдолд өвчний тохиолдол хоёр дахин буурч, тархалтын хурд мэдэгдэхүйц удааширдаг нь тогтоогдсон байна. Эрүүл мэндийн яамнаас дээрх үндэслэлүүдийг дурдан Боловсролын яаманд бага ангийн сурагчдын өвлийн амралтыг хоёр долоо хоногоор урагшлуулах албан саналаа хүргүүлээд байгаа юм. Тэгвэл энэ тухайд ямар байр суурьтай байгаа талаар Боловсролын ерөнхий газрын дарга Т.Ням-Очир мэдээлэл өглөө.
Тэрээр "Өчигдөр Эрүүл мэндийн яамны Тохиолдлын удирдлагын баг шуурхай хурал зарлаж, энэ хуралд Боловсролын яам болон Боловсролын ерөнхий газрын төлөөлөл оролцон нөхцөл байдлын талаар мэдээлэл сонслоо. Томуу, томуу төст өвчний тархалт хүүхдүүдэд илүү өндөр эрсдэлтэй байгаа тул өвлийн амралтыг 14 хоногоор урагшлуулах саналыг мэргэжлийн байгууллагууд дэвшүүлээд байна.
Хуулийн зохицуулалтын хувьд Сургуулийн өмнөх болон ЕБС-ийн тухай хуулийн 5-р зүйлд хичээлийн жилийн эхлэх, үргэлжлэх, дуусах хугацааг Боловсролын асуудал хариуцсан төрийн захиргааны төв байгууллага буюу Боловсролын яам тогтоох ёстой гэж заасан. Мөн 5-р зүйлийн 5-д байгалийн нөхцөл, цаг агаарын онцлогтой холбоотойгоор тухайн орон нутгийн Засаг даргын саналыг харгалзан хичээлийн жилийн хугацаанд өөрчлөлт оруулж болно гэж тусгасан.
Танхимын сургалт нэг өдөр, нэг цаг ч тасалдсан тохиолдолд тухайн хугацаанд хүүхэд авах ёстой мэдлэг, чадвар тасалддаг. Иймээс үүссэн хоцрогдлыг хэрхэн нөхөх вэ гэдэгт сургууль болон хичээлийг удирдаж буй багш нар хамтран ажиллах шаардлагатай. Нэгдүгээр улирал 15 долоо хоног үргэлжилдэг бөгөөд үүнд бие даалтын нэг долоо хоног багтдаг. Энэ улирлын төгсгөл рүү хүүхдүүд ядарч, дархлаа нь сулардаг.
Тиймээс ажил хаялтын үеэр тасалдсан хичээлийн даалгаврыг нэмэгдүүлэхгүй байх, багш нарыг ажлын бус цагаар ажиллуулахгүй байх чиглэлээр тодорхой зөвлөмж өгсөн. Харин тасалдсан агуулгыг хичээлийн жилийн нийт үргэлжлэх 170–185 хоногийн хугацаанд тухайн багш, сургууль өөрийн онцлогт тохируулан нөхөхөөр зохион байгуулах талаар бэлтгэл ажлыг хангаж байна. Хэрэв улирлын амралтад дахин өөрчлөлт орвол цахимаар заасан хичээлийн нөхөлтийг яаж хийх зэрэг нарийвчилсан асуудлууд гарч ирэх юм.
Одоогийн нөхцөл байдал зөвхөн энэ жил гарч буй асуудал биш бөгөөд жил бүр давтагддаг асуудал. Үүнийг харгалзан 2025 оны хоёрдугаар сард хичээлийн жилийн бүтцэд өөрчлөлт оруулж, эрүүл мэндийн байгууллагын судалгаанд тулгуурлан дэгдэлт нэмэгддэг 50-р долоо хоногийн өмнө амралтыг нэг долоо хоногоор урагшлуулж, тухайн долоо хоногийг зургаадугаар сар руу шилжүүлсэн. Гэвч энэ жил томуугийн дэгдэлт 2–3 долоо хоногоор улам эрт эхэлж байгаа нь дахин зохион байгуулалт хийх шаардлагыг үүсгэж байна. Ингэснээр хичээлийн жилийн бүтцийг тогтвортой барихад хүндрэлтэй нөхцөл бүрдэж байгаа юм.
Боловсролын байгууллагын хувьд нэг өдөр, нэг цагийн хичээл ч хүүхдийн хөгжилд чухал ач холбогдолтой. Тиймээс хичээл сургалтыг тасалдуулалгүй зохион байгуулах шийдлүүдийг гаргах нь нэн чухал. Хэрэв улирлын амралтыг урагшлуулах шийдвэр гарвал хоёрдугаар улирлын эхлэх хугацааг мөн наашлуулах боломжийг судалж, тухайн үед томуугийн дэгдэлт буурсан байх эсэхийг тооцон, хүүхдүүд тасралтгүй суралцах нөхцөлийг бүрдүүлэхийн тулд салбар хоорондын байгууллагууд хамтран ажиллах шаардлагатай" гэлээ.
