МАН-ын Удирдах зөвлөл өглөө 08.00 цагт хуралдаж хэд хэдэн асуудал хэлэлцжээ.

Тодруулбал, хурлаар намын дарга Н.Учралыг УИХ-ын даргад нэр дэвшүүлж, намын дэргэд 7 бодлогын хороод байгуулжээ.

Намын дэргэд байгуулсан бодлогын хороод:

• Хүний хөгжил -УИХ-ын гишүүн Ж.Галбадрах,
• Банк санхүү - УИХ-ын гишүүн Д.Энхтүвшин,
• Хотын хөгжил - Алдараа,
• Хөдөөгийн хөгжил - УИХ-ын гишүүн Ц.Идэрбат ахлан ажиллах болсон байна.

Өнөөдөр УИХ-ын шинэ даргыг сонгох юм байна. Учир нь маргааш “Үндэсний бахархлын өдөр” тохиож байгаа бөгөөд Төрийн гурван өндөрлөг гурвуулаа оролцдог арга хэмжээтэй байдаг аж. Тиймээс өнөөдөртөө багтаан шинэ УИХ-ын даргыг томилохын тулд МАН-ын Удирдах зөвлөл өглөө эрт хуралдаж, шийдвэрээ гаргасан байна. УИХ дахь АН-ын бүлэг намын дарга УИХ-ын дарга байж болохгүй гэсэн хуулийн төслийг санаачилж байгаагаа даваа гарагт мэдэгдсэн. Гэтэл МАН-ынхан шинэ даргаа УИХ-ын даргаар сонгох шийдвэрийг гаргалаа.

Энэ талаар өчигдөр МАН-ын Ерөнхий нарийн бичгийн дарга Я.Содбаатар "УИХ-ын ээлжит сонгуулиар МАН 68 суудал буюу олонхын санал авсан. Парламентад олонхын санал авсан нам УИХ-ын даргад нэр дэвшүүлнэ. Улс төрийн бусад намтай зөвшилцөхгүй, ярилцахгүй УИХ-ын даргын асуудлыг бие даан шийднэ. УИХ-ын даргад хэнийг дэвшүүлэх, ямар байдлаар ажиллах нь манай намын бодлого. МАН-ын 31-р их хурлаар бид намын дотоод асуудлаа шийдсэн. Одоо төртэй холбоотой томилгоонуудыг ойрын өдрүүдэд шийднэ. Шийдэж төрийг бүтэн болгох ёстой" гэсэн байр суурийг илэрхийлсэн.