Нийслэлийн зарим шатахуун түгээх станцуудад өчигдөр /2025.11.17/ орой оочер дараалал үүссэн. Аж үйлдвэр, эрдэс баялгийн яамнаас шатахууны тасалдал үүсэхгүй, үнэ нэмэгдэхгүй талаар мэдээлэл хийлээ.

АҮЭБЯ-ны Төрийн нарийн бичгийн дарга Б.Дашпүрэв: ОХУ-ын Роснефть компаниас 2025 оны арваннэгдүгээр сард 57.8 мянган тонн АИ-92 автобензин, 1.6 мянган тонн АИ-95 автобензин, 75.8 мянган тонн дизель түлш захиалсан. Мөн Газпромнефть компаниас 5 мянган тонн АИ-92 автобензин, 10 мянган тонн дизель түлш, Нефтьхимисервис компаниас 20 мянган тонн дизель түлш, БНХАУ-ын Петрочайна интернэшнл компаниас 6.5 мянган тонн АИ-92 автобензин, 10 мянган тонн дизель түлш  худалдан авахаар тус тус захиалсан юм.

2025 оны арваннэгдүгээр сарын 1-18-ны өдрүүдэд:

• Сүхбаатар боомтоор 672 вагон буюу 40346 тонн Аи-92 автобензин, 996 вагон буюу 61911 тонн дизель түлш, Аи-95 автобензин 22 вагон буюу 1289 тонн,
• Эрээнцав боомтоор 2000 тонн Аи-92 автобензин,  3200 тонн дизель түлш,
• Цагааннуур боомтоор Аи-92 автобензин 366 тонн, 2400 тонн дизель түлш,
• Боршоо боомтоор 171 тонн дизель түлш,

-Замын-Үүд боомтоор 2500 тонн Аи-92 автобензин, 2500 тонн дизель түлш тус тус орж ирээд байна.

Түүнчлэн, 2025 оны  арваннэгдүгээр сарын 18-ны өдөр:

• Сүхбаатар боомтоор цагийн байдлаар Сүхбаатар боомтоор 23 вагон Аи-92 автобензин, 7 вагон Аи-95 автобензин, 10 вагон дизель түлш орж ирсэн.

 УБТЗ-ын мэдээгээр улсын хэмжээнд 256 вагон байгаагаас дизель түлш 104 вагон, АИ-92 автобензин 122 вагон, АИ-95 автобензин 7 вагон, ТС-1 онгоцны түлш 2 вагон, Шатдаг хий 21 вагон тус тус байна. Буух өртөөд буюу Толгойт өртөөнд 36 вагон, Аршаант өртөөнд 13 вагон, Сайншанд өртөөнд 8 вагон, Эрдэнэт өрөөнд 4 вагон, Дархан өртөөнд 17 вагон, Чойр өртөөнд 10 вагон буюу нийт 88 вагон Аи-92 автобензин байгаа. Буух өртөөдийг чиглэн 34 вагон Аи-92 автобензин замд явж байна.

ОХУ-ын Роснефть компанийн Ангарски боловсруулах үйлдвэрээс 2025 оны арваннэгдүгээр сарын 14-16-ны өдрүүдэд 105 вагон буюу 6,300 тонн Аи-92 автобензин, 8 вагон буюу 480 тонн Аи-95 автобензиний ачилт хийгдэж ОХУ-д замд явж байна. Аи-92 бензины үнэ нэмэгдэхгүй. Шатахууны нийлүүлэлт тасалдалгүй явагдаж байгаа тул нөөц хангалттай. Манай улсын АИ-92 бензиний шатахууны хэрэгцээ сард 60-65 мянган тонн байдаг. Тэгэхээр арваннэгдүгээр сарын 17-ны өдрийн байдлаар 45 мянган тонн бензин орж ирсэн буюу гуравны хоёр нь ороод ирсэн гэсэн үг. Иймд одоо 10 хоногт 20 гаруй мянган тонн бензин оруулж ирвэл хэрэглээ тасалдахгүй.