Ерөнхий сайд Г.Занданшатар Шанхайн хамтын ажиллагааны байгууллага (ШХАБ)-ын гишүүн орнуудын Засгийн газрын тэргүүн нарын зөвлөлийн өргөтгөсөн хуралдаанд ажиглагчаар оролцохоор өнөөдөр ОХУ-ыг зорино.
Ерөнхий сайдтай хамт Зам тээвэр хөгжлийн сайд Б.Дэлгэрсайхан, Сангийн сайд Б.Жавхлан, Шадар сайд Х.Ганхуяг, Эрдэс баялаг, аж үйлдвэрийн сайд Г.Дамдинням нар хамт тус хуралд оролцох бөгөөд 19-нд эргэж ирэх юм байна.
Жил бүхэн зохион байгуулагддаг тус хурал энэ жил ОХУ-ын Москва хотод болох юм. Тус хуралд манай улс ажиглагчийн байр сууриас оролцдог.
Уулзалтад гишүүн орнууд эдийн засгийн интеграцид стратегийн түлхэц өгөхийг зорьж байгаа бөгөөд ялангуяа Хятад–Оросын худалдаа болон олон талт худалдааны хамтын ажиллагаанд чиглэх аж. Энэхүү уулзалт нь гурван сарын өмнөх Тяньжиний дээд хэмжээний уулзалтыг үргэлжлүүлж байгаа аж.
ОХУ энэ уулзалтаар ШХАБ-ын ээлжит даргын албыг хүлээн авч, Москва–Бээжингийн түншлэл болон гишүүн орнуудын эдийн засгийн хамтын ажиллагааг бэхжүүлэхэд анхаарлаа төвлөрүүлж байна. Энэ жилийн уулзалтын гол сэдэв нь эдийн засгийн хамтын ажиллагаа бөгөөд худалдааны хамтын ажиллагааны замын зураглал, эрчим хүч, хөрөнгө оруулалт, төлбөр тооцооны механизм зэрэг асуудлуудыг хэлэлцэх юм. Тяньжиний уулзалтын үеэр ОХУ-ын Ерөнхийлөгч Владимир Путин эрчим хүч, дэд бүтцийн хамтын ажиллагааг онцолж байсан бол Хятад улс орон нутгийн валют ашигласан худалдааг нэмэгдүүлэхийг дэмжиж байсан юм.
