МАН-ын 31 дүгээр Их хурал хоёр дахь өдрөө үргэлжилж байна. Өнөөдөр Их хурлын төлөөлөгчид МАН-ын хөтөлбөр болон намын дүрмийн нэмэлт өөрчлөлтийн талаар хэлэлцэж, Хяналтын ерөнхий хорооны болон Бага хурлын гишүүдийг сонгоно. 

УИХ-Ын Гишүүн Б.Баярбаатараар Ахлуулсан Ажлын Хэсэг Намын Хороо, Үүрүүд, Дэргэдэх Байгууллагуудаар Дамжуулан Гишүүдээс Санал Авч, Намын Дүрэмд Өөрчлөлт Оруулах төслийг боловсруулсан. 

Уг төслийг 31 дүгээр Их хурлын салбар хуралдаанаар хэлэлцүүлсэн юм. Дээрх дүрэм, хөтөлбөрийн өөрчлөлтийг Улс төрийн намын тухай хуульд нийцүүлэн шинэчилж буйгаараа онцлогтой. Мөн МАН-ын 31 дүгээр Их хурлын төлөөлөгчид  “Уламжлал, шинэчлэл, хөгжилд хөтөлсөн МАН” тайлан илтгэл, Хяналтын Ерөнхий хорооны тайланг хэлэлцэж, тогтоол гаргана.

Хурлын редакцын комиссыг Д.Тогтохсүрэн ахлан ажиллаж байна. Монгол Ардын намын 31 дүгээр Их хурлын тогтоолоор Бичиг баримт боловсруулах, редакцын комиссыг дараах бүрэлдэхүүнтэйгээр баталсан байна.

Тус комиссын даргаар МАН-ын Удирдах зөвлөлийн гишүүн Д.Тогтохсүрэн, Нарийн бичгийн даргаар Социал демократ Ахмадын холбооны Ерөнхий нарийн бичгийн дарга Т.Гантөмөр нар ажиллаж байна.Бичиг баримт боловсруулах, редакцын комиссын гишүүдээр УИХ-ын гишүүн Д.Рэгдэл, Социал демократ Ахмадын холбооны тэргүүлэгч Б.Энхмандах, УИХ-ын гишүүн Б.Уянга, УИХ-ын гишүүн, Төрийн байгуулалтын байнгын хорооны дарга Ц.Сандаг-Очир, Социал демократ Монголын Эмэгтэйчүүдийн холбооны Удирдах зөвлөлийн гишүүн Б.Батцэцэг, Намын Бага хурлын гишүүн Ц.Цогзолмаа нар ажиллаж байна.