МАН-ын 31 дүгээр Их хурал үргэлжилж байна. Үдээс хойших хуралдаанаар намын даргыг сонгох үйл ажиллагааг зохион байгуулав.

Намын Ерөнхий нарийн бичгийн дарга Я.Содбаатар намын даргад Эдийн засгийн хөгжлийн сайд Н.Учралыг намын даргад нэр дэвшүүлж байгаагаа зарласан. Харин МХАҮТ-ын ерөнхийлөгч Б.Лхагважав өөрийнхөө нэрийг заалнаас дэвшүүлсэн юм. Ингээд хоёр нэр дэвшигч өөрсдийнхөө илтгэлийг тавьсны дараа Их хурлын төлөөлөгчид нэр дэвшигчдээс асуулт асууж, үг хэлсэн.

Тооллогын комиссын даргаар УИХ-ын гишүүн, Барилга хот байгуулалтын сайд Э.Бат-Амгаланг, нарийн бичгийн даргаар М.Мандхайг сонгосон байна. Ингээд санал хураалтыг нууцаар явуулж, санал тоолох машинаар тоолсон.

Санал хураалтад намын анхан шатны байгууллагуудаас ирсэн 2086 төлөөлөгчийн саналыг тоолоход 94.95 хувийн саналаар Эдийн засаг хөгжлийн сайд Н.Учрал МАН-ын даргаар сонгогдлоо. Тэрээр 39 насандаа шинэ үеийн МАН-ын 13 дахь даргаар сонгогдож байна.

Саналын хайрцгийг нээхэд 2086 хуудаснаас хүчинтэй 2079, хүчингүй 7 хуудас байв. Н.Учрал 1974 санал буюу 94.95, Б.Лхагважав 105 буюу 5.05 хувийн санал авчээ.