Тээврийн прокурорын газраас Нийслэлийн хэмжээнд 2025 оны арваннэгдүгээр сарын 1-ний өдрийн байдлаар хүүхэд өртсөн зам тээврийн ослын судалгааг танилцууллаа. Энэ хугацаанд нийт 552 ослын улмаас 606 хүүхэд гэмтсэн бөгөөд хамгийн олон тохиолдол Баянзүрх болон Хан-Уул дүүргүүдэд бүртгэгдсэн байна.

Хүүхэд өртсөн ослын тоо дүүргүүдийн хувьд Баянзүрх дүүрэгт 148, Хан-Уул дүүрэгт 126, Сонгинохайрхан дүүрэгт 102, Сүхбаатар дүүрэгт 92, Баянгол дүүрэгт 88, Чингэлтэй дүүрэгт 50 гэж мэдээлэв.

Осолд өртсөн 606 хүүхдийн 376 нь явган зорчигч байсан бол 98 нь тээврийн хэрэгслээр зорчиж явах үедээ, 132 нь унадаг дугуй болон цахилгаан дугуйтай хөдөлгөөнд оролцох үедээ осолд өртжээ.

Хүүхэд хохирсон 140 хэрэгт Эрүүгийн хуулийн дагуу мөрдөн шалгах ажиллагаа явуулсан бөгөөд тэдгээрийн 71 нь шүүхээр шийдвэрлэгдэж, буруутай этгээдэд ял оногдуулсан байна.

Тээврийн прокурорын газраас замын хальтиргаа, гулгаа ихэссэн энэ үед 10 хүртэлх насны хүүхдийг харгалзах хүнгүйгээр замын хөдөлгөөнд явганаар оролцуулахгүй байхыг эцэг эхчүүдэд санууллаа. Мөн жолооч нар техникийн бүрэн бүтэн байдлаа хангаж, замын нөхцөлд тохируулан хурдыг зөв тохирч, анхаарал болгоомжтой хөдөлгөөнд оролцохыг зөвлөсөн байна.