УИХ-ын чуулганы нэгдсэн хуралдаанаар 2026 оны төсвийн хууль батлагдсантай холбоотой УИХ-ын тогтоолын төслийг хэлэлцлээ. Тус хэлэлцүүлгийн үеэр тогтоолд нийслэл 275 тэрбум төгрөгийн бонд гаргах заалт туссан байна. Гэхдээ Засгийн газраас өргөн барьсан төсвийн төсөлд уг заалт байхгүй байсан бөгөөд хэлэлцүүлгийн явцад нэр бүхий гишүүд санал гаргаж дэмжигджээ. Тиймээс ирэх жил нийслэл 275 тэрбум төгрөгийн дотоодын бонд гаргахаар болжээ.

Энэ талаар УИХ-ын гишүүн Б.Жаргалан: 2026 оны төсвийн тухай хууль баталсантай холбоотой УИХ-ын тогтоолын төслийг би сая л харж байна. Төсвийн байнгын хороогоор хэлэлцсэн юм шиг байна. Гэхдээ шууд ингэж оруулж ирж болохгүй. Үүн дээр хэд хэдэн ноцтой асуудал байна. Нийслэл 275 тэрбум хүртэлх төгрөгийн дотоодын үнэт цаас гаргах асуудал туссан байна. Нийслэл сүүлийн хоёр жил мөнгөөр туйлж байгаа. Сүүлдээ хэдэн их наядаар зам барина гээд сууж байгаа. Урд хөршөөс хагас коксжих нүүрс 200 гаруй тэрбум төгрөгөөр аваад сууж байгаа. Гэтэл нэмээд 275 тэрбумын бонд гаргаж болох юм уу. Өмнөх гаргасан бондын зарцуулалт тодорхойгүй. Ийм газар дахиад бонд гаргана гэж оруулж ирж болдог юм уу.

УИХ-ын Д.Үүрийнтуяа: Төсвийн тухай хууль баталсантай холбоотойгоор УИХ-ын тогтоолын төсөл орж ирж байгаа. Өөрөөр хэлбэл, Төсвийн хуулийг хэрэгжүүлэх үүрэг чиглэлийг Засгийн газарт өгч байгаа тогтоолын төсөл юм. Бид дагасан хууль тогтоол дээр Засгийн газрын үнэт цаас гаргах эрх олгох тухай тогтоолын төслийг түрүүн баталсан. Энэ дотор баталж байгаа гэсэн үг. УИХ-ын гишүүдээс зарчмын зөрүүтэй санал гаргаж энэ дүнг 425 тэрбум төгрөг болгон нэмэгдүүлсэн. Үүнээс аймгийн болоод нийслэлийн гаргах үнэт цаасны хэмжээг ялгасан. Үлдсэн нь аймаг дээр гарна гэсэн үг. Төсөв дээрээ дүнгээ баталчихсан.