МАН-ын Бодлогын зөвлөл хуралдаж намын даргад Эдийн засаг, хөгжлийн сайд Н.Учралын нэрийг дэвшүүлэхээр тохирсон. Энэ амралын өдрүүдэд МАН-ынхан Их хурлаараа намын даргаа сонгож, батламжилна.

Бүх шатандаа хоёр хуваагдаад байгаа МАН-ынхан Их хурлаа хоног тоолон хүлээж байна. Учир нь, Их хурлын дараа намын даргатай, УИХ-ын даргатай болж, гацаад байсан асуудлууд жигдрэх тал руугаа орно. Гэхдээ Ерөнхий сайд Г.Занданшатарын тал хүч түрж, нам, засаг, УИХ-аа бүгдийг авах бололтой. Уг нь УИХ-ын дарга асан Д.Амарбаясгалангийн талынхантай тохиролцоод томилгоогоо хувааж хийгээд цааш явах нь намын эв нэгдэл болон Засгийн газрын тогтвортой байдалд хэрэгтэй ч тэд нөгөө талынхантайгаа тохирохгүй цааш явах бодолтой байгаагаа ил далд илэрхийлээд эхэлжээ.

УИХ-ын дарга асан Д.Амарбаясгалан өчигдөр намын даргад өрсөлдөхгүй гэдгээ албан ёсоор зарласан. Тэгвэл тэдний талаас Нийслэлийн Засаг дарга Х.Нямбаатар нэр дэвшихээр яригдаж байсан юм. Ерөнхий сайдын талынхан ч хотын дарга Х.Нямбаатар намын даргад өрсөлдөхөөс айж байсан учраас өчигдөр Ерөнхийлөгч У.Хүрэлсүх хотын дарга Х.Нямбаатарыг дуудаж уулзаж, намын даргад нэр дэвшүүлэхгүй тохироо хийснийг эх сурвалж мэдээлж байна. Хотын дарга Х.Нямбаатар өчигдөр Ерөнхийлөгчийн өрөөнөөс гарч ирэхдээ хэвлэлийнхэнтэй таарч ярилцлага өгсөн. Ингэхдээ "Би намын даргад өрсөлдөхгүй ээ. Нийслэлийн ажлаа үргэлжлүүлэн хийнэ" хэмээн ярьсан. Үүнээс харахад тэрээр Ерөнхийлөгчтэй намын даргад өрсөлдөхгүй, нийслэлийн Засаг даргаараа үргэлжлүүлэн ажиллах тохироо хийсэн бололтой. Энэ тохиолдолд намын Бодлогын зөвлөлөөс нэр дэвшүүлсэн Эдийн засаг, хөгжлийн сайд Н.Учралыг намынхан нь дэмжээд явах бөгөөд тэрээр өрсөлдөгчгүй намын дарга болох бололтой.

Эвлэрүүлэх ажлын хэсэг байгуулагдсанаас хойш УИХ дахь бүлгийн дарга, УИХ-ын дэд даргын томилгоог хийж, УИХ-ын даргын томилгоог үлдээсэн. Учир нь намын дарга болсон хүнийг УИХ-ын даргаар томилохоор ярьсан гэсэн мэдээлэл гарч байсан юм. Тиймээс Эдийн засаг хөгжлийн сайд Н.Учрал Их хурлаараа намын дарга болж, дараа нь УИХ-ын даргаар томилогдох бололтой.