Засгийн газрын өнөөдрийн хурлаар Эдийн засгийн эрх чөлөөний тухай хууль, Хөрөнгө оруулалтын хууль, Зөвшөөрөл мэдэгдлийн тухай хууль, үүнийг дагасан 120 хуулийн нэмэлт өөрчлөлтийн төслийг танилцуулжээ. Энэ талаар Эдийн засаг, хөгжлийн сайд Н.Учрал мэдээлэл өглөө.

Тэрээр “Ирэх оны төсвийн хүрээний мэдэгдлийг өргөн мэдүүлэхдээ нэрлэсэн ДНБ-д эзлэх тэнцвэржүүлсэн орлогын харьцааг 30.6 хувь хүртэл бууруулсан. Өөрөөр хэлбэл, татвараар бүрддэг орлогын ДНБ-д эзлэх хувь буурах тусам хувийн хэвшилд илүү орон зай бий болдог гэсэн үг. Өнгөрсөн онд энэ үзүүлэлт 37 хувь байсан бол энэ жил ийнхүү буурсан. Төр бизнесийн үйл ажиллагаанд оролцдог, хувийн хэвшилтэй өрсөлддөг гэх шүүмжлэлд тоон үндэслэлтэйгээр хариулт өгөхийн тулд бид ийм бодлого баримталж байгаа. Үүнтэй холбоотойгоор татварын багц хууль, Эдийн засгийн эрх чөлөөний тухай хууль болон бизнес, хөрөнгө оруулалтын орчныг сайжруулах хуулийн төслүүдийг боловсруулж, өргөн мэдүүлснээр бизнесийн орчин илүү сайжирна гэж үзэж байна.

Мөн бид хиймэл оюун ухаан ашиглан хүчин төгөлдөр мөрдөгдөж буй 378 хуульд дүн шинжилгээ хийсэн. Үүний үр дүнд эдийн засгийн эрх чөлөөг зөрчиж болзошгүй 228 хууль, харин шууд зөрчиж байгаа 110 хуулийн заалт байгааг илрүүлсэн. Энэ нь бизнес эрхлэхэд, ялангуяа гадаадын хөрөнгө оруулагчдад таагүй орчин үүсгэж байгаа нь тодорхой байна. Цаашид эдгээр хуулиудын заалтуудыг өөрчлөх, шинэчлэх замаар эрх зүйн орчныг сайжруулах ажил хийгдэх юм.