Монголын эрүүл мэндийн ажилтны Үйлдвэрчний эвлэлийн холбооноос эрүүл мэндийн салбарын эмч, ажилтнуудын цалин хөлс нэмэгдүүлэх асуудалд төр, засгийн зүгээс үл тоомсорлосон хандлага гаргаж буйтай холбоотойгоор мэдээлэл хийлээ.

МЭМАҮЭХ-ны дарга Ч.Нарантуяа: Эрүүл мэндийн салбарынхан ажил хаяж чадахгүй гэж бодвол эндүүрэл шүү. Бид үндсэн цалингаа 3.5 сая төгрөг болгож нэмэгдүүлэхээр арваннэгдүгээр сарын 13-ны өдрийн өглөөний 08:00 цагаас эхлэн орон даяар ажил хаяна. Түүнчлэн, арваннэгдүгээр сарын 12-нд үндэсний хэмжээнд жагсаал цуглаан хийхээр бэлтгэж байна. Ажил хаялт үр дүнд хүрэхгүй бол эрүүл мэндийн салбарын ажилтнууд нийтээрээ ажлаас гарах өргөдлөө өгөхөд бэлэн байна. Монголын эрүүл мэндийн ажилтны Үйлдвэрчний эвлэлийн холбооноос эрүүл мэндийн салбарын эмч, ажилтнуудын цалин хөлс нэмэгдүүлэх асуудалд төр, засгийн зүгээс үл тоомсорлосон хандлага гаргаж буйтай холбоотойгоор мэдээлж байна.

МҮЭХ-ны ерөнхийлөгч Э.Тамир: Эрүүл мэндийн салбарын ажилтнуудын эцсээ хүртэл хэлэлцээр хийж, үр дүнд хүрэхийг хүлээлээ. Эмч, эмнэлгийн ажилтнууд улс орон даяар жагсаал цуглаан хийхэд 2 , ажил хаяхад 3, улсын төсөв батлахад 4 хоног үлдлээ. Төр төмөр нүүрээ эрүүл мэндийн салбартаа харуулж байна. Энэ хугацаанд шийдэлд хүрэхгүй бол хүний амь нас, эрүүл мэндэд учрах аливаа эрсдэлийг төр хариуцна шүү. Нэгэнт УИХ, ЗГ нь эрүүл мэндийн салбарын 37 мянга гаруй ажиллагсдыг үл тоож байгаа учраас бид  өнөөдөр Монгол Улсын Ерөнхийлөгчид өргөх бичиг барина.

 Өнгөрсөн тав дахь өдөр Ж.Чинбүрэн сайд уулзаж, тодорхой шийдвэр гаргах болов уу гэсэн боловч таван цаг хүлээлгээд ирээгүй. УИХ-ын гишүүд эрүүл мэндийн салбарын ажилтнуудын цалинг нэмүүлэх зарчмын зөрүүтэй санал гаргасан. Гэвч олны өмнө цалин нэмэх ёстой гэж ярьж байсан УИХ-ын гишүүд зарчмын зөрүүтэй санал гаргахад эл асуудлыг унагаах санал гаргалаа. Нүүрэн дээрээ хамт байгаа шүү гэж хэлсэн УИХ-ын гишүүд санал хураахад эсрэг кноп дарж байгааг нэг биш удаа харлаа. УИХ-ын гишүүдэд найдалтгүй юм байна. 

УИХ-ын гишүүд ямар ажил хийх ёстойгоо мэддэггүй юм байна. Та бүхэн барилга, зам, сургууль барих гэж ажиллаагүй шүү. Та бүхэн бүгдэд ээлтэй хууль тогтоомж гаргах ёстой.  Тэр бариад буй барилга байшинд чинь ажиллах хүн алга байна. Эрүүл мэндийн салбарынхан тэр чигээрээ бүгд өргөдлөө өгөхөд бэлэн байгааг ойлгооч.

Эрүүл мэндийн ажилтны цалин хөлсийг нэмэгдүүлэх тэмцлийг улс төржүүлэхийг тэвчихгүй. Ажилтнуудыг боомилохыг  тэвчихгүй шүү. Жишээ нь,  ажил хаялт хийсэн эмнэлгийг хамгийн  түрүүнд хяналт шалгалт хийнэ гэж сүрдүүлж байна.

Бид ажлаа хаяхад гуравхан хоногийн хугацаа байна. Бидний тэмцэлд Засгийн газар анхаарлаа хандуулж төсөв батлаач гэж хүсэж байна гэлээ.