Хөгжлийн бэрхшээлтэй иргэд амьжиргааны түвшинд хүрэх хэмжээний тэтгэмж авахыг төрөөс шаардаж, өнөөдөр Төрийн ордны баруун талд жагсаал хийлээ. Тэдний хэлж буйгаар одоогийн олгож буй тэтгэмж нь наад захын хэрэглээнд хүрэлцэхгүй байгаа тул тэтгэмжийг нь нэмэгдүүлэх шаардлага тавьж байгаа аж. Мөн өчигдөр УИХ-ын нэгдсэн чуулганы хуралдааны үеэр хөгжлийн бэрхшээлтэй иргэдийг доромжилсон УИХ-ын гишүүн Ж.Батсуурийг уучлалт гуйхыг шаардав.
Хөгжлийн бэрхшээлтэй иргэний төлөөлөл: Бидний хэн нь ч амьдралаа сонгож төрөөгүй. Хөгжлийн бэрхшээлтэй хүн ч бас энэ улсын иргэн. Гэтэл төр засаг биднийг үл тоож, бүр “муусайн хоолны савнууд” гэж доромжиллоо. Бид тансаглал биш наад захын хүний эрхээ шаардаж энд зогсож байна.
Иргэн Б.Өлзийбаяр: Эм тариагаа аваад ажил хийгээд хичээгээд явж байна. Зүгээр гэртээ хэвтэж байгаа хоолны савнууд гэж ярьж болохгүй. Бодит байдлыг үнэлж дүгнэхгүйгээр ингэж ярьж болохгүй. Би 10 гаруй жил тэргэнцэр дээр сууж байна. Сүүлийн үед нийтийн тээвэр гэх мэт сайжруулалт хийж байгаа ч өнөөдөр гудамж талбайгаар явж чадахгүй, барилга байгууламж руу орж чадахгүй ийм нөхцөл байдалд байна. Хөгжлийн бэрхшээлтэй иргэдийнхээ дуу хоолойг сонсоосой, биднийг төлөөлөөд сууж байгаа хоёр гишүүний үгийг сонсоосой гэж хүсэж байна.
Асран хамгаалагч Ш.Уранчимэг: 2026 оны төсөв дээр хөгжлийн бэрхшээлтэй иргэний тэтгэмжийг 6000 эсвэл 18000 төгрөгөөр нэмнэ гэж ярьж байна. Ийм мөнгөөр яах юм бэ? Доромжилж ханахгүй байна уу? Би өөрийн жишээн дээр яръя. Манай хүний памперс нь өдөрт 20 мянган төгрөг болж байгаа. Хүнлэг, энэрэнгүй ёсыг байгуулж байгаа гэж яриад байх юм. Тэр нь хаана байна? Би асран хамгаалагчийг төлөөлж ирсэн. УИХ гишүүд 7 сая төгрөгийн цалин авч байхад бид 302,5 мянган төгрөгөөр амьдрах гэж ядаж байна. Газар тэнгэр шиг ялгаа. Ядаж биднийг доромжилж байгаа юм шиг хачин байдлаар тэтгэвэр нэмэхээ боль. Нэмж чадахгүй гэж яриад яах юм. Заавал тэд болгоод өг гэж шаардахгүй, жоохон нэмээд өгчих гэж байна.
Иргэдтэй УИХ-ын гишүүн О.Саранчулуун тэргүүтэй гишүүд гарч ирж уулзлаа.
Тэрээр “Хөгжлийн бэрхшээлтэй иргэдийн тэтгэмжийг амьжиргааны доод түвшинд хүргэе гэсэн шаардлагыг тавьж байгаа. Амьжиргааны доод түвшнийг бүс бүсээр өөр тогтоодог. Хөгжлийн бэрхшээлтэй иргэдийн тэтгэмж улсын төсөвт эзэлж байгаа дүн нь ганцхан тэрбум төгрөгийн асуудал. Гэтэл "муусайн халамжаар хооллогсод" гэдэг хандлага байдаг. Бодит байдал дээр эдгээр иргэдэд өгөх тэтгэмжийн дүн нь маш жаахан учир анхаараад өгөөч гэдэг хүсэлтийг тавьж байна" гэлээ..
Монголын тэргэнцэртэй иргэдийн үндэсний холбооноос хөгжлийн бэрхшээлтэй иргэн 397-572 мянган төгрөг, тэдний асран хамгаалагч нь 302,5 мянган төгрөгийн тэтгэмжийг сар бүр авдаг хэмээн мэдэгджээ.
