Хөгжилтэй зарим тохиолдолд нэгийг бодуулах ухаарал хайрласан бичлэгүүдээрээ үзэгчдийн хайрыг татсан “TAG” энтертайнмент “Намайг ачсан дурлал” анхны бүрэн хэмжээний киногоо үзэгчдэдээ хүргэсэн билээ. Тэгвэл "TAG" Entertainment-ийн үүсгэн байгуулагч, жүжигчин Б.Билгүүнжаргал, М.Цэндбаяртай ярилцсанаа хүргэж байна.
-“TAG” энтертайнментыг яагаад байгуулах болсон бэ. Жүжигчний мэргэжлээр суралцаад өөр чиглэлээр ажиллах боломж байсан уу. Яагаад өөрсдийн студиэ нээе гэж бодсон бэ?
-Б.Билгүүнжаргал: “TAG” энтертайнментаа 2022 онд үүсгэн байгуулсан. Одоогоор гурван жилийг ардаа үдээд явж байна. Бид 2021 онд жүжигчний мэргэжлээр их сургуулиа төгссөн. Өөрсдийнхөө хийе гэж бодож, зорьж байгаа зүйлсээ өөрсдөө бүтээе гэж бодоод нээсэн.
-М.Цэндбаяр: Миний хувьд “TAG” энтертайнментдаа харьцангуй сүүлд орсон. Надад нэр нь маш их таалагддаг байсан. Намайг жүжигчнээр урьсанд найздаа баярладаг.
-Яагаад “TAG” гэж нэрлэсэн бэ?
-Б.Билгүүнжаргал: Ер нь аливаа зүйлийн нэр өгнө гэдэг хэцүү байдаг шүү дээ. Анх “Hashtag” гээд нэрлэж байсан. Гэхдээ манай студийн н.Есөнчулуу найз “TAG” гэвэл гоё юм шиг байна гээд ярилцаж байгаад өөрчилсөн. Манай энтертайнментын нэр бичигдэх, тогтооход амар.
-Мэдээж хамтран ажиллахад итгэлцэл гэдэг хамгийн чухал шүү дээ. Та хоёрын хувьд анх хэрхэн танилцаж байсан бэ. Яагаад хамтдаа ажиллах болсон бэ?
-М.Цэндбаяр: Бид уран бүтээлийн гараагаа эхэлж байгаа хүмүүс болохоор нэг нэгэндээ итгэнэ гэдэг хэцүү шүү дээ. Гэхдээ бид хамтдаа “Алладин” хүүхдийн жүжиг дээр ажилласан нь нэг нэгэндээ итгэх, цаашдаа уран бүтээл бүтээх том урам зориг болж өгсөн. Тухайн жүжгийг толилуулахын тулд хамтдаа санаагаа олж, 2-3 сарын хугацаанд өдөр, шөнөгүй ажилласан. Түүнээс л нэгнээ итгэл даах хүн гэдгийг мэдэж авсан.
-Яагаад М.Цэндбаяр найзыгаа “TAG” энтертайнментад урьсан бэ?
-Б.Билгүүнжаргал: Манай “TAG” энтертайнмент цахимд орчимд контент хийдэг. Цэндээгээ хамтарвал ямар бол гэж хараад л байдаг байсан. Гоё энергитэй, шууд хүний нүдэнд тусдаг хүн гэж байдаг шүү дээ. Анх манай бичлэгт ороод өгөөч гэж гуйхад манай найз надаас ямар ч мөнгө аваагүй, сэтгэлээрээ ирж оролцож байсан. Мөн намайг хүндлээд 3-4 ээлжийн солих хувцастай өөрийгөө гоё бэлдэж ирсэн. Түүнийг нь хараад үнэхээр гоё мэдрэмж авсан.
-Энтертаймант салбарт олон контент бүтээгч, жүжигчин байна. Тэр дундаас хэрхэн ялгарч гарна гэж бодсон бэ?
-Б.Билгүүнжаргал: Анх ангийнхаа дарга Отгон-Эрдэнэ гээд найзтайгаа хамт аймшгийн, инээдмийн хослуулсан мини “Ёстой солиор” нэртэй таван дугаартай контент гаргаж байсан. Түүнээс цааш бичлэгүүдээ таслахгүй хийсэн. Гэхдээ манайх тогтмол эсвэл өдөр болгон, долоон хоног хэд орох ёстой гэсэн зарчмын дагуу ажилладаггүй. Одоог хүртэл бид өөрсдийн хүссэн контентоо хийгээд л явдаг.
-М.Цэндбаяр: Олон энтертайнмент, жүжигчдээс “TAG” энтертайнментын ялгарах онцлог нь пранк бичлэгүүд болов уу гэж боддог. Түүнийгээ сайжруулаад улам цаашаа хөгжүүлээд явна гэж хичээж байна.
-Контентуудаараа дамжуулан нийгэмд ямар мессеж өгөхийг зорьдог вэ?
-М.Цэндбаяр: Улаанбаатар хотод бухимдах шалтгаан үнэхээр их байна. Ийм байхад хандалтын төлөө стресс нэмэх зүйл хиймээргүй байдаг. Тиймээс хүнд жаахан ч гэсэн инээмсэглэл бэлэглэхийг хичээдэг.
-Танай энтертайнментыг нэгтгэдэг үнэт зүйл юу вэ?
-Б.Билгүүнжаргал: Манай үнэт зүйл бол итгэл, хүндлэл. Нэг нэгэндээ итгэж хүндэлдэг. Хүний итгэлийг алдах хэцүү. Бид өөрсдөө зоригтой байхыг хичээдэг. Зориг дагаж хийморь гэдэг.
-М.Цэндбаяр: Пранкуудын санаагаа ч зоригтой гаргахыг хичээдэг. Зоригтой байснаараа хүн аливаа зүйлд хүрч чадна гэж итгэдэг.
-Мөн анхны киногоо өлгийдөн авсанд нь баяр хүргэе. Эхний кино нь үзэгчдэд хүрэх мэдрэмж ямар байсан бэ. Киноны санаагаа анх хэрхэн гаргасан бэ?
-М.Цэндбаяр: Баярлалаа. Бидний анхны бүтээл “Намайг ачсан дурлал” киног үзсэн бүх хүндээ маш их баярлалаа. Бид хамгийн анхны уран бүтээлээ хийсэн учраас алдаатай, оноотой байсан байж магадгүй. Та бүхэн түүнийг ойлгоорой. Бидний киног үзсэн бүх хүндээ ахин дахин баярлалаа л гэж хэлмээр байна. Яагаад гэвэл бид уран бүтээлийн гараагаа эхэлж байгаа жүжигчид болохоор маш их итгэл, урам зоригийг өгсөн. Одоо бид хоёр дахь уран бүтээл рүүгээ орох гэж байна.
-Б.Билгүүнжаргал: Цэндээгийн ангийн Дашдолгор гээд киноны зохиолыг бичсэн найруулагч бий. Энэ киноны санааг 2-3 жилийн өмнө л ярьж байсан. Манай киноны зохиол дээр Отгонбаатар, Дашдолгор, Тайван гээд гурван хүн ажилласан. Бид маш их хичээж ажилласан. Үзэгчдэд таалагдсан байх гэж найдаж байна.
-“Намайг ачсан дурлал” киноны маркетинг болгож пранк цуврал контент цацсан. Тухайн санаагаа хэрхэн олсон, оролцуулах хүмүүсээ яаж сонгосон бэ?
-М.Цэндбаяр: Ер нь “TAG” энтертайнментын сошиал сувгуудаараа пранк контент хийж цацдаг байсан. Тийм болохоор MF tv-гийн Онхууш, Оффшор ахтай ярилцсаны үүднээс энэхүү санаагаа олж авсан. Энэ ташрамд, Онхууш, Оффшор ахдаа баярлалаа гэж хэлмээр байна. Монголчуудын хайртай хүмүүсийг сонгох гэж хичээсэн.
-Б.Билгүүнжаргал: Мөн хүний хэр баргийн ойртож чаддаггүй хүмүүсээр пранк хийхээр сонгосон. Жишээлбэл, Ооноо эгчийг хэр баргийн хүн очоод пранк хийж чадахгүй. Зөвтгөх зүйл нь бид ах, эгч нараасаа уучлал гуйж байгаа.
-Анхны кинонд ивээн тэтгэгч гэдэг чухал шүү дээ. Хэрхэн ивээн тэтгэгчээ олох вэ гэсэн айдас, сандрал байсан уу?
-Б.Билгүүнжаргал: Айдас өдөр болгон байсан. Гэхдээ Монголд хөндөгдөөгүй гоё сэдэвтэй болохоор итгэлтэй, зохиолоо харахаар л хөөрөөд байсан. Ивээн тэтгэх, дэмжих байгууллага хайгаад явахад дэмжих нь дэмжээд ажилласан.
-М.Цэндбаяр: Бид хоёр сар гаруйн хугацаанд олон байгууллагын хаалга татсан. Нэлээд ч гүйсэн. Хариу өгнө гээд байхгүй болчихдог. Бараг шантрахаа дөхсөн ч биднийг дэмжиж, туслалцаа үзүүлсэн байгууллагууддаа талархдаг.
-Залуу энтертайнмент болохоор санхүүгээ зохицуулахад амаргүй байдаг байх даа?
-Б.Билгүүнжаргал: Санхүү угаасаа хэцүү шүү дээ. Студиэ байгуулаад шууд ямар нэгэн хүн мөнгө өгөхгүй. Түүнийгээ өөрсдөө олохын тулд гурван жил оффисын түрээснээс эхлээд зардал байлгүй яах вэ.
-М.Цэндбаяр: Контент бүтээхийн тулд камер, компьютероос эхлээд нэлээд зардал гардаг даа. Ер нь зардал ихтэй болохоор хоёр жилийн хугацаанд цалингүй ажилласан. Харин саяхан киногоо нээгээд анхныхаа орлогыг олоод байж байна. Үнэнээ л хэлье, хоёр жилийн дараа л цалинтайгаа золголоо.
-Яагаад жүжигчний мэргэжлийг сонгосон бэ?
-Б.Билгүүнжаргал: Манай ах унтахаас өмнө надад хошин шог, киноны сценүүдээс ярьж өгдөг байсан. Түүнийг нь сонсохоор үнэхээр аз жаргалтай байдаг байсан болохоор ах шигээ гоё ярьдаг, хүмүүсийг инээлгэж үзэх юм сан гэж боддог болсон. Ингээд л СУИС-д шалгалт өгөөд жүжигчний мэргэжлийг сонгосон.
-М.Цэндбаяр: Багаасаа урлагт дуртай, хайртай хүүхэд байлаа. Найрамдалын Харшийн сүлд модны наадамд жил оролцдог идэвхтэй хүүхэд байлаа. Тэр үед Б.Отгонбат багштайгаа танилцаж, жүжигчин болохоор шийдсэн.
-“TAG” энтертайнментын дараагийн зорилго юу вэ. Хүмүүс та нараас юу хүлээж байх шиг байна?
-М.Цэндбаяр: Хүмүүс “Киног нь үзсэн. Гоё кино болсон байна. Цаашдаа гэгээлэг кинонууд хийгээрэй” гэсэн сэтгэгдэл олон ирж байгаа. Бид цаашдаа кино уран бүтээлээ илүү чанартай хийхээр зорьж байна.
-Анх төлөвлөж байсан зорилгууддаа эхнээсээ хүрч байгаа юу. Үзэгчдэдээ хандаад үг хэлбэл?
-Б.Билгүүнжаргал: Тэгэлгүй яах вэ. Эхнээсээ төлөвлөсөн зорилгууддаа хүрээд л явж байгаа. Түүнээсээ урам зориг аваад дараагийн төлөвлөгөөнүүдээ гаргаад, ажил урагштай болохоор гоё байна. Манай “TAG” энтертайнментыг сонгон үздэг үзэгч нартаа маш их баярлалаа. Бид маш их хичээнэ. “TAG” энтертайнменттай ойрхон байгаарай.
-М.Цэндбаяр: Хамгийн эхний төлөвлөгөө “Халамцуу яриа” нэвтрүүлэгт ортлоо контент хийнэ шүү гэж байсан. Энэ жил орж чадлаа. “Халамцуу яриа” нэвтрүүлгийн хамгийн залуу зочид болсон. Бүгдэд нь баярлалаа. Хайртай шүү.
