Зүүн Ази, Номхон далайн бүс нутаг дэлхийн бусад бүсүүдтэй харьцуулахад эдийн засгийн хувьд илүү сайн үзүүлэлттэй хэвээр байгаа ч дэлхийн тодорхойгүй байдал нэмэгдэж буй энэ үед ажлын байр нэмэгдүүлэх болон өсөлтийг тогтвортой хадгалахын тулд илүү зоримог шинэчлэлүүд хийх шаардлагатай байгааг Дэлхийн банк онцолжээ.

Дэлхийн банкны 2025 оны аравдугаар сарын “Зүүн Ази, Номхон далайн эдийн засгийн шинэчилсэн төлөв” тайланд дурдсанаар, тус бүсийн эдийн засаг 2025 онд 4.8 хувиар өсөх төлөвтэй байна. Энэ нь 2024 оны 5.0 хувийн өсөлтөөс бага зэрэг буурч байгаа үзүүлэлт юм. Вьетнам улс 6.6 хувийн өсөлтөөрөө тэргүүлж байгаа бөгөөд түүний дараа Монгол (5.9%), Филиппин (5.3%) орж байна. Харин Хятад, Камбож, Индонези тус бүр 4.8 хувь, Номхон далайн арлууд 2.7 хувь, Тайланд 2.0 хувь өсөхөөр таамаглагджээ.

Бүс нутгийн нийтлэг сааралтын дунд Монгол Улсын эдийн засаг илүү өөдрөг төлөвтэй байгаа нь онцгой анхаарал татаж байна. Монголын ДНБ-ий өсөлт 2024 онд 5.1 хувь байсан бол 2025 онд 5.9 хувьд хүрэх төлөвтэй байна. Энэ өсөлтийг голлон Оюу толгой ордын зэсийн үйлдвэрлэлийн нэмэгдэл, мөн сүүлийн жилүүдийн уур амьсгалын хүндрэлээс хойш хөдөө аж ахуйн салбарын сэргэлт дэмжиж байгаа юм. 2026 онд өсөлт 5.6 хувь орчимд хадгалагдах боловч гадаад эрэлт буурахтай холбоотойгоор бага зэрэг саарах төлөвтэй байна. Ийнхүү бүс нутгийн олон эдийн засаг удааширч буй энэ үед Монгол Улсын уул уурхай төвтэй өсөлт богино хугацаанд давуу тал болж байгаа ч энэ нь эдийн засгийн бүтцийн хамаарлыг тод харуулж байна.