Багш нарын ажил хаялт энэ 7 хоногт ч үргэлжлэх бололтой. Баасан гарагт хоёр тал тохиролцоонд хүрсэн гэсэн мэдээлэл зарим хэвлэл мэдээллийн байгууллагаар гарсан ч өнөөдөр сургууль, цэцэрлэг орж эхлээгүй байна. Мөн хэзээнээс эхэлж хичээл, сургууль эхлэх талаар одоогоор Боловсролын яам болон Боловсролын ерөнхий газраас албан ёсны мэдээлэл өгөөгүй байна.
Монголын боловсрол, шинжлэх ухааны үйлдвэрчний эвлэлийн холбооноос багш нарын цалинг 3.5 сая төгрөгт хүргэх шаардлага тавьж, 2025 оны аравдугаар сарын 9-нөөс эхлэн 500 гаруй боловсролын байгууллагын 30 мянган багш, ажилтан хугацаагүй ажил хаялт зарлаад байгаа.
Боловсролын сайд П.Наранбаяр өнгөрсөн баасан гарагт сэтгүүлчдэд өгсөн мэдээлэлдээ "Ирэх даваа гараг гэхэд сургууль, цэцэрлэгийг оруулах шаардлагатай. Монголын нийгмийн амьдралыг үүнээс илүү царцааж болохгүй шүү дээ. Хүүхдийн сурлагын хоцрогдол ноцтой үр дагаварт хүргэнэ" хэмээн ярьсан. Гэсэн хэдий ч өнөөдрөөс хөдөө орон нутгийн сургууль, цэцэрлэгүүд ажил хаялтад нэгдээд буй. Өөрөөр хэлбэл, багш нарын ажил хаялт зогсох нь бүү хэл цар хүрээгээ улам тэлж байна. Тиймээс Засгийн газар Монголын боловсрол, шинжлэх ухааны үйлдвэрчний эвлэлийн холбоотой яаралтай тохиролцоонд хүрч сургууль, цэцэрлэгийг хичээллүүлж эхлэхгүй бол хүүхдийн боловсролын хоцрогдол, цаашилбал аюулгүй байдал алдагдахад хүрээд байна.
