"Оюу толгой" компаниас 20 сая ам.долларыг зөвлөх үйлчилгээнд зарцуулна гэж аваад хоёр саяыг нь "Монгол Хаан" жүжигт оруулсан гэх мэдээллийг Хууль зүй, дотоод хэргийн сайд Б.Энхбаяр анх өөрийн цахим хуудсаараа дамжуулан мэдээлж байсан.

Тэгвэл энэ асуудлыг одоо ч хууль хяналтын байгууллага шалгаж эхлээгүй байгаа бөгөөд толгой компани болох "Эрдэнэс Монгол" нэгдлийн гүйцэтгэх захирал С.Наранцогт мэдээгүй, анх мэдээлэл цацагдахад мэдсэн гэсэн тайлбарыг өгсөн юм.

“Эрдэнэс Монгол” нэгдлийн гүйцэтгэх захирал С.Наранцогт: Нууцад авсан байсан учраас бид огт мэдээлэлгүй байна. Эрдэнэс Оюу толгой өөрсдөө нууцад аваад шийдвэр гаргасан байсан. Засгийн газрын тэмдэглэл гэж үзүүлээд байна лээ. Тэнд нь нууц гэсэн зүйл байсан юм шиг байна. Надад үзэж, танилцах боломж байгаагүй. Одоо ЗГХЭГ-аас Ажлын хэсэг томилогдоод шалгалт хийж ажиллаж байгаа. Энэ ажлын хэсэгт би компаниасаа хоёр хүн томилоод энэ асуудлыг нэлээд нухацтай, нарийн мэдээлэлтэй, дүгнэлт хийхээр ажиллаж байгаа. Бид охин компаниудтайгаа тодорхой дүрэм журмын хүрээнд ажилладаг болохоос өдөр тутмын үйл ажиллагаанд нь оролцдоггүй. Ажлын хэсгийн тайлан гарахаар олон нийтэд нээлттэй мэдээлнэ. Тайлангаар санхүүгийн зөрчилтэй байвал хууль хяналтын байгууллагад шилжүүлнэ гэлээ. 

Тухайн үед буюу 20 сая ам.долларын Оюу толгой компаниас авахад Эрдэнэс Оюу толгой компанийн гүйцэтгэх захирлаар Н.Цэрэнбат ажиллаж байжээ. Одоо тэрээр Оюу толгой компанийн ТУЗ-д ажиллаж байгаа юм.