Засгийн газрын ээлжит хуралдаанаас гаргасан шийдвэрийн талаар Аж үйлдвэр, эрдэс баялгийн сайд Г.Дамдинням, Барилга хот байгуулалтын сайд Э. Бат-Амгалан нар мэдээлэл өглөө.
Өнөөдрийн хуралдаанаар Гэр бүлийн тухай хуулийн шинэчилсэн найруулгын төслийг хэлэлцэж, УИХ-д өргөн барихаар болжээ. Мөн эмч, багш нарын орон сууцны хүртээмжийг нэмэгдүүлэх санал боловсруулж, Засгийн газарт танилцуулах ажлын хэсэг байгуулсан байна. Түүнчлэн шатахууны нийлүүлэлтийн цаг үеийн байдлын талаар танилцуулсан бөгөөд салбарын сайд Г.Дамдинням мэдээлэл өглөө.
Аж үйлдвэр, эрдэс баялгийн сайд Г.Дамдинням: Засгийн газар шатахууны асуудлыг шийдэж, шатахууны нийлүүлэлтийг энгийн үеийнхээс хоёр дахин нэмэгдүүлээ. Өнөөдөр 22:00 цагийн үед 110 вагон буюу 6600 тонн шатахуун орж ирнэ. Энэ бол энгийн үеийнхээс 3 дахин их хэмжээ юм. ОХУ найрсаг хөршийн хүрээнд бүх чадлаараа тусалж дэмжихээ илэрхийлсэн. Баасан гарагт хоёр талын цахим хурал дахин хийнэ. Мөн БНХАУ-ын талтай холбогдож ирэх сард 15500 тонн шатахуун авах хэлэлцээр хийсэн. Шатахууны хомсдол дууссан гэж иргэддээ хэлмээр байна. АИ92-ын доголдлоос шалтгаалаад АИ95-ын нөөц дундарсан. Нөхөж авна. Цаашдаа Засгийн газар шатахууны хомсдол гаргахгүй байх тал дээр ажиллана.
Цаашдаа бид газрын тосны үйлдвэрээ ашиглалтад оруулах ёстой. Бүтээн байгуулалтын ажил 50 хувьтай явж байна. 2027 оны эхний хагас гэхэд үйлдвэрээ ашиглалтад оруулахаар зорьж байна. Мөн нэг жилийн шатахууны нөөцийн багтаамжтай савтай болно. Түүнчлэн тархмал эрчим хүчний эх үүсвэрийг дэмжинэ. Ингэснээр цахилгаан автомашин нэмэгдэнэ гэж үзэж байгаа.
Барилга хот байгуулалтын сайд Э. Бат-Амгалан: Төрийн оролцоотой барилга орон сууц нийслэлд түлхүү бий. 9 байршил дээр 21694 айл орох 2025-2028 онд хэрэгжүүлэх төсөл явж байна. Үүнээс гадна Барилга хот байгуулалт орон сууцжуулалтын яам Залуус 1,2 хорооллын төслүүдийг ирэх жил хэрэгжүүлж эхлэх гэж байна. Улаанбаатар хотод хэрэгжиж байгаа орон сууцны төслүүд дээр миний биеэр ахлуулсан ажлын хэсэг байгууллаа. Манай ажлын хэсэг энэ онд багтаад эрүүл мэнд, боловсролын салбар, төрийн албан хаагчдад зориулсан орон сууцны хөтөлбөрийг судална. Хамгийн нэгдүгээрт ипотекийн зээлийн эх үүсвэр болон дээрх салбарын ажилтнуудын орон сууцны судалгааг хийнэ.
Нийслэлийн хэмжээнд боловсролын салбарт гэхэд 22 мянган ажилтан албан хаагч ажиллаж байна. Үүний тэн хагас нь орон сууц шаардлагатай байгаа. Тиймээс эдгээр салбарын ажилтнуудыг 5-10 хувийн урьдчилгаа төлөх нөхцөлтэйгөөр 6 хувийн ипотект орох боломжийг судалж ажиллана.
