ЭН АР СИ СИ компани Хэрэглэгчийн итгэлийн улирал тутмын судалгааг Монгол-Японы хүний нөөцийн хөгжлийн төвтэй хамтран 2025 оны 3-р улиралд амжилттай зохион байгууллаа. 2025 оны 3-р улирлын өрхийн санхүүгийн байдал, ажил эрхлэлтийн талаар Монгол-Японы хүний нөөцийн хөгжлийн төвийн Захирал Ц.Даваадорж танилцуулсан юм.

Тэрээр "Монгол Улсын хэрэглэгчдийн итгэлийн индексийн ээлжит судалгаа явагдлаа. 2009-2014 он хүртэл жилд нэг удаа, 2014 оноос хойш улирал бүр хийгдэж байгаа хэрэглэгчдийн итгэлийн индексийн судалгаа нь Монгол Улсын эдийн засгийн нөхцөл байдлыг тодорхой харуулах үзүүлэлт болдог. 2025 оны 3-р улирлын хэрэглэгчдийн итгэлийн индексийн судалгааг энэ оны долдугаар сарын 1-нээс есдүгээр сарын 30-ны хооронд хийсэн юм. Уг судалгаанд Улаанбаатар хот болон 21 аймгийн 977 хүнийг хамрууллаа.

Хэрэглэгчийн итгэлийн индекс гэх судалгаа нь эдийн засгийн ерөнхий байдал болон хэрэглэгчдийн өөрсдийнх нь санхүүгийн байдлын талаар өгч байгаа үнэлгээ гэж ойлгож болно. Ийм төрлийн индексийн судалгааг хөгжингүй олон орнууд тогтмол хийдэг. Тухайлбал, АНУ, Англи, Австрали, Япон зэрэг улс нь тогтмол энэхүү судалгааг хийдэг байна. Хэрэв энэхүү итгэлийн индекс нь сайжрах юм бол бид ингэж үзэж болно. Манай улсын эдийн засгийн байдал харьцангуй тогтвортой сайжирч байна гэж ойлгож болно. Харин эдийн засаг муудах хэрээр хэрэглэгчдийн итгэл буурч, хэрэглэгчид хэрэглээгээ танаж эхэлдэг.