Цалингаа 3.5 сая төгрөг буюу 1000 ам.доллар болгож нэмэгдүүлэх шаардлагыг нь Засгийн газар биелүүлээгүй тул багш нар өнөөдрөөс хугацаагүй ажил хаялтаа эхлүүллээ.
Засгийн газар өчигдөр энэ асуудлаар хуралдаад багш нарын цалинг 15-20 хувь, эмч нарын цалинг 10-15 хувь, тэтгэврийг 8 хувиар нэмэх болсноо зарласан. Энэ нь ойролцоогоор багш, эмч нарын цалин 150-300 мянган төгрөгөөр, ахмадын тэтгэвэр 45-55 мянган төгрөгөөр нэмэгдэнэ гэсэн үг юм.
Улмаар ажил хаялтыг зохион байгуулж буй МБШУҮЭХ бусад Үйлдвэрчний эвлэлийн холбоодын удирдлагуудтай Төрийн ордонд уулзаж, шийдвэрээ танилцуулсан ч МБШУҮЭХ хүлээж аваагүй аж.
Боловсролын салбарын ажил хаялттай холбоотой асуудлаар МБШУҮЭХ-ны дарга З.Цогтгэрэл өчигдөр ЗГХЭГ-ын ажилтнууд, Боловсролын сайдтай уулзсаныхаа дараа сэтгүүлчдэд мэдээлэл өгсөн.
МБШУҮЭХ-ны дарга З.Цогтгэрэл: Ажил хаялт МБШУҮЭХ Засгийн газартай 2024-2026 онд хийх хэлэлцээрийнхээ хүрээнд энэ ажил хаялтыг зохион байгуулж байгаа гэдгийг ойлгох хэрэгтэй. Өнөөдөр Засгийн газрын хэрэг эрхлэх газраас дуудсан болохоор ирсэн.
П.Наранбаяр сайд ч байсан. Асуудлыг шийдэх, гарц гаргалгаа ярих юм болов уу гэсэн чинь дайрч давшилж байна. “Чи улс төржиж байгаа шүү”, “Буруу зүйлд уриалж байгаа шүү” гэж загнаж байна. Манай холбоо улс төржөөгүй. Энэ оны нэгдүгээр сарын 1-нд бичгээ өгөөд, дөрөвдүгээр сарын 1-нд дахиж хүргүүлээд, долдугаар сарын 9-нд шаардлагаа өгөөд яг хууль ёсны дагуу явж байгаа байгууллагыг хууль бус хүмүүстэй холбож, нийгэмд буруу зөрүү ойлгуулахыг хичээсэн учраас бид эндээс ямар ч үр дүнд хүрэхгүй юм байна гэж үзлээ. Тиймээс ажил хаялт маргааш болдгоороо болно.
Харин Боловсролын сайд П.Наранбаяр Засгийн газрын хуралдааны шийдвэрийг танилцуулахдаа “Ажил хаялт зарлаад байгаа Монголын үйлдвэрчний холбооны хүмүүст хандаж хэлэхэд, эдийн засгийн бололцоондоо тааруулж л ийм шийдвэр гаргаж байна. Шууд маргааш үндсэн цалинг 3.5 сая болгоно гэдэг Монгол Улсын эдийн засагт ямар ч боломжгүй. Ингэж нэмбэл 3.3 их наяд төгрөг дахиад нэмэх шаардлагатай болно. Бид гурван жилийн төлөвлөгөөгөө гаргаад жил болгон нэмэх замаар багшийн үндсэн цалинг 3.5 сая төгрөг болгоё гэж зориод байна. Ажил хаялтын тал дээр арбитр нь томилогдоод маргаан үргэлжлээд явж байгаа” гэсэн.
Ажил хаялтад нэгдсэн багш нар хичээл сургалтын үйл ажиллагаа зохион байгуулахгүй ч ажил дээрээ ирдгээрээ ирж байгаа аж.
