Засгийн газрын хэрэг эрхлэх газрын дарга С.Бямбацогт, Сангийн сайд Б.Жавхлан, Эдийн засаг хөгжлийн сайд Н.Учрал, УИХ-ын гишүүн Д.Үүрийнтуяа, Б.Хэрлэн нар Ерөнхий сайдыг огцруулах асуудлын саналын томъёоллын талаар мэдээлэл хийлээ.

ЗГХЭГ-ын дарга С.Бямбацогт: Засгийн газрыг огцруулахаар гарын үсэг зурсан гишүүдийн олонх Төрийн байгуулалтын байнгын хорооны гишүүд. Тэднээс 19 гишүүн огцруулахгүй, 3 гишүүн огцруулъя гэдэг санал өглөө. УИХ-ын Дэд даргаас Ерөнхий сайдыг огцруулах асуудлыг ямар томьёоллоор санал хураах вэ гэдгийг асуухад "Байнгын хорооноос гаргасан томьёоллоор санал хураана" гэлээ. Бидний зүгээс хэрвээ ингэвэл Үндсэн хууль зөрчинө шүү гэдгийг хэлсэн. Гэтэл бид мэдэж байгаа гэж хэллээ. Өөрөөр хэлбэл, Үндсэн хуулийн бус замаар хууль зөрчиж Засгийн газрыг огцруулах асуудлыг УИХ-ын нэгдсэн чуулганы хуралдаанаар хэлэлцэх гэж байна. Монгол Улсын Үндсэн хуулийн 43 дугаар зүйлийн 1 дэх хэсэгт УИХ-ын гишүүдийн дөрөвний нэгээс доошгүй нь Ерөнхий сайдыг огцруулах саналыг албан ёсоор тавивал УИХ гурав хоногийн дараа хэлэлцэж эхлэн, 10 хоногийн дотор шийдвэрлэнэ. УИХ-ын гишүүний олонх уг саналыг дэмжсэн бол Ерөнхий сайдыг огцруулах тухай УИХ-ын тогтоол баталсанд тооцож, шинэ Ерөнхий сайдыг 30 хоногийн дотор томилно гэж заасан байдаг. Иймээс Үндсэн хуульд зааснаар Ерөнхий сайдыг огцруулахыг дэмжье гэсэн томьёоллоор санал хураах ёстой. Гэтэл байнгын хороон дээр Ерөнхий сайдыг огцруулахыг дэмжихгүй гэдэг томьёоллоор санал хурааж, УИХ-ын гишүүд хуультай танилцах боломжийг хааж байна. Мөн кнопод хүрэхгүй байдлаар Засгийн газрыг Үндсэн хуулийн бус аргаар унагаах үйлдэл хийх гэж байна. Үндсэн хууль зөрчиж Ерөнхий сайдыг огцруулах гээд байгаа нь илэрхий болж байна. Тиймээс УИХ дахь МАН-ын бүлгийн гишүүд Үндсэн хууль зөрчсөн санал хураалтад оролцохгүй. Хэрвээ Ерөнхий сайдыг огцруулахыг дэмжье гэсэн Үндсэн хуулийн томьёоллоор санал хураалгавал бид оролцоно.