Монголын эрчим хүч, геологи, уул уурхайн үйлдвэрчний холбооноос эрчим хүчний салбарт тулгамдаж буй үндсэн дөрвөн агуулгын хүрээнд мэдээлэл өглөө. Үүнд:
Техник, технологийн хуучрал, элэгдэл, гэмтэлтэй холбоотой үйлдвэрлэлийн ослууд ар араасаа гарсаар байна.
Эрчим хүчний салбарын ажилтнуудын улсын хоёрдугаар зөвлөгөөний тухай.
Салбарт өрнөж байгаа цомхотгол, бүтцийн өөрчлөлт.
2026 онд эрчим хүчний салбарын ажилтнуудын цалин хөлс нэмэгдэхгүй нөхцөл байдал үүсгээд байгаа зэрэг асуудал багтаж байна.
ЭХГУУҮХ-ны даргын үүргийг түр орлон гүйцэтгэгч н.Дагвадорж: Манай салбарын удирдлагууд, ялангуяа сайд маш дүлий байгаа. Ажилтнуудын төлөөлөлтэй нэг ч удаа уулзаагүй. Эрчим хүчний салбарын реформ гэдэг нь ямар нэгэн үндэсний хороо, компани байгуулаад шийдэгддэг асуудал биш. Энэ нь хууль эрх зүйн шинэчлэлээс эхэлнэ. Эрчим хүчний 2001 онд батлагдаж байсан хууль өнөөдөр энэ салбарыг зохицуулах боломжгүй болсон. Манай салбарт хүний нөөцийн дутагдалд орж, ажиллах хүнгүй болоод байна гээд байхад цомхотгоё гэдэг зүйл яригдаад байна. Эрчим хүчний салбарын ажилтнуудын улсын хоёрдугаар зөвлөгөөнөөс гарсан “Ажилтнаа сонсъё” шаардлагыг хүргэе. Тодруулбал:
УИХ-д Төрийн хэмнэлтийн хуульд өөрчлөлт хийх шаардлагыг хүргүүлж байна. Хэмнэлт хийх газраа хийгдэхгүй ажилтнуудад хийгдээд байгаа.
Засгийн газрын 370-р тогтоол гэж бий. Түүнд сайдын зөвлөлд ажилтны болон ажил олгогчийн төлөөлөл байх ёстой. Гэтэл Эрчим хүчний сайдын зөвлөлд манай холбооны төлөөлөл байхгүй. Иймд Засгийн газрыг Эрчим хүчний сайддаа 370-р тогтоолыг үүрэг болгохыг шаардаж байна.
Эрчис Монгол компанийг татан буулга. Энэ бол манай салбарт ямар ч нэмэр болохгүй байна.
Мөн 20-30 жил ажиллаж байгаа 2-3 сая төгрөгийн цалин авч байгаа хүмүүсийн дэргэд гаднаас ирсэн 3-4 менежер 5-6 сая төгрөгийн цалин аваад ажлын өрөө, машины хангамж эдэлж байгаа нь зохисгүй байна. Хууль зөрчсөн шийдвэрээ боль.
Эрчим хүчний яаманд 2026 оны нэгдүгээр сарын 1-нээс эрчим хүчний салбарын ажилтнуудын цалинг 30-аас доошгүй хувиар нэмэгдүүлэх шаардлага хүргүүлж байна.
Манай салбарын удирдлагуудын алдаатай шийдвэрүүдийг хаацайлахгүйгээр ил тод, нээлттэй хэлэлцэж, хариуцлага тооцдог байх хэрэгтэй.
Эрчим хүчний салбарын засаглалыг нээлттэй болгож ажилтнуудын нийгмийн хамгааллын асуудлыг шийдвэрлэх шаардлагатай байна.
Энэхүү шаардлагаа холбогдох албан тушаалтнуудад нь хүргүүлнэ.
