УИХ дахь МАН-ын бүлгийн дарга Ж.Бат-Эрдэнэ бүлгийн хурлаа зарлан хуралдуулахгүй байгаа учраас 38 гишүүн нь өнөөдөр 16:00 цагт хүлгээ хуралдуулах шаардлага тавьсан. Энэ талаар УИХ дахь МАН-ын бүлгийн дарга Ж.Бат-Эрдэнэ тайлбар өглөө.
Тэрээр “Бүлгийн даргын хувьд нэгд, энэ хоёр бичгийнхээ учрыг олох ёстой. Хоёрт, талуудыг уулзуулах үүрэгтэй. Бичиг өргөн барьсан хүмүүсийн ард талд нэг талд нь УИХ-ын дарга, нөгөө талд нь Ерөнхий сайд байна. Энэ хүмүүс хоорондоо учраа олоогүй байхад гарын үсэг зурсан хүмүүс нь хоорондоо учраа олох уу. Тиймээс бүлэг дээр хоосон хэрүүл болно. Шууд орж хэрэлдээд байх уу, эсвэл тодорхой хэмжээний уулзалтууд хийж байж бүлгээ хуралдуулах уу гэдэг асуудал байна. Өргөн барьсан хүмүүс цаад хүмүүсийнхээ зөвшөөрөлгүйгээр бичгээ татахгүй. Бүлгийн групп дээр энэ талаар зөндөө ярьсан.
Хоёр талд улс төрийн акц хийгээд байна. Үүнийг удирдах зөвлөл шийдэх ёстой. Бидний дээр Удирдах зөвлөл байгаа. Удирдах зөвлөл яагаад өнөөдрийг болтол хуралдуулахгүй байгаа юм бэ. Удирдах зөвлөл шийдвэр гаргасны дараа бүлгийн хурлаа хийх бодолтой байна. Маргааш лхагва гарагийн 12:00 цагт бүлэг хуралдуулах тов зарласан.
Хоёр талыг эвлэрүүлэх ажлыг би хийгээд явж байна. Ерөнхийлөгчтэй очиж уулзсан. Хоёр тал хоёр бичгээ татаж авах санал хүртэл тавьсан. Ерөнхий сайд, УИХ-ын дарга 1-2 удаа уулзсан. Магадгүй хоёр тал зөвшилцөөд хэрвээ саналаа татацгаавал гол асуудал улсын төсөв болно. Бид бүх асуудлаа олон талаас нь ярьсан” гэлээ.
