2026 оны улсын төсвийн тухай хуулийг Засгийн газар есдүгээр сарын 1-нд УИХ-д өргөн барьсан. Тэгвэл МАН-ын даргын сунгаанаас болж улс төрд үүсээд байгаа нөхцөл байдлын улмаас УИХ ирэх жилийн төсвөө хэлэлцэж чадахгүй гацаанд ороод байгаа.

УИХ ирэх оны төсвийг арваннэгдүгээр сарын 15-ны дотор батлах хуулийн хугацаатай ч өнөөдөр хоёр дахь хэлэлцүүлгээ ч хийгээгүй, гацаанд ороод байгаа юм. Тэгвэл УИХ хуульд заасан хугацаандаа багтаж ирэх оны төсвийг батлахгүй бол тарах уу гэдэг асуулт бий. Энэ талаар УИХ-ын Тамгын газрын дарга Б.Баасандоржоос тодруулахад "Монгол Улсад хүчин төгөлдөр үйлчилж байгаа 800 гаруй хуулийн аль ч хууль дээр ирэх жилийн төсвөө арваннэгдүгээр сарын 15-нд баталж чадахгүй бол УИХ тарна гэдэг нэг ч заалт байхгүй. 1992 оны Үндсэн хууль батлагдсанаас хойш ийм нэг ч заалт байхгүй. Харин арваннэгдүгээр сарын 15-ны дотор төсвөө хэлэлцэн батална гэсэн заалт байдаг" гэсэн юм.

Үүнээс харахад УИХ улс төрөөс болж ирэх сарын 15-нд төсвөө баталж чадахгүй байсан ч тарахгүй, харин он гараад цалин, тэтгэвэр, төрийн урсгал зардлаа санхүүжүүлэх боломжгүй болох юм. Тиймээс УИХ, Засгийн газар улс төржилтөө хойш тавьж, цаг хугацаандаа хэлэлцэн батлах ёстой улсын төсвөө хэлэлцэх шаардлагатай байна.