УИХ дахь МАН-ын бүлгийн ээлжит бус хурал өнөөдөр болж өндөрлөлөө. Энэхүү хурлыг 38 гишүүний гарын үсэг бүхий албан бичгийн дагуу бүлгийн дэд дарга У.Отгонбаяр даргалан зохион байгуулсан байна. МАН-ын бүлгийн ээлжит бус хурлаар багш, эмч нарын цалин, ахмадын тэтгэвэр нэмэх асуудлыг хэлэлцлээ.

МАН-ын бүлгийн дэд дарга У.Отгонбаяр: УИХ дахь МАН-ын бүлгийн ээлжит бус хурал хуралдаж дууслаа. Уг хурал нь 38 гишүүний гарын үсэгтэй ээлжит бус хурлыг хуралдуулах албан бичиг ирсний дагуу миний бие бүлгийн дэд даргын хувьд энэ хурлыг зрхион байгуулж дүрэм журмын дагуу хуралдаж дууслаа. Энэхүү хурлаар хоёр асуудлыг хэлэлцсэн. Нэгдүгээрт Монгол Улсын Ерөнхий сайд Г.Занданшатарын өнөөгийн нийгэм улс төрийн нөхцөл байдлын талаар мэдээллийг сонссон. Үүнтэй холбогдуулж зарим гишүүнээс горимын санал гаргаж тодорхой газруудад чиглэл өгсөн бөгөөд тогтоол гарсан. Хоёрдугаарт бүлгийн дарга Ж.Бат-Эрдэнийг чөлөөлөх асуудлыг хэлэлцэж шийдвэрлэсэн. 

УИХ-ын гишүүн Д.Үүрийнтуяа: Энэ цаг үед бид бүхэн өөрсдийн нөөц боломжийг дайчилж тодорхой зардлуудыг хасаж, танах хөрөнгө оруулалтын ажлуудаа эрэмбэлэх, шаардлагатай зардлууд дээр хасалт хийж байж төсвийн ачааллыг тэцвэржүүлэх байдлаар багш, эмч нарын цалинг нэмэгдүүлэх, тэтгэвэр тэтгэмжийг хуульд заасан хэмжээгээр нэмэгдүүлэх асуудлыг оруулах нь зүйтэй гэж үзсэн. Инфляцын түвшин 8.5 хувьтай байгаа гэж тооцсон. Тиймээс хуулийн хүрээнд инфляцын түвшинтэй уялдуулж тэтгэврийг нэмэх үүрэгтэй. Тиймээс 6 хувийг 8.5 болгон нэмэгдүүлэх, эмч, багш нарын цалин хөлсийг төсвөөс хэмнэж болох зардлын тооцооллоо гаргаж УИХ-ын ажлын хэсэгтэй хамтран ажиллаж цалинг нэмэгдүүлэх асуудал дээр тодорхой шийдлүүдийг гаргах үүрэг чиглэлийг Засгийн газарт тавих шаардлагатай гэж хэлэлцлээ. Бүлгийн гишүүд энэ асуудлыг дэмжсэн юм.

УИХ-ын гишүүн Х.Ганхуяг: Бид бүхний тулгамдаж байгаа асуудал болох Эрүүл мэндийн салбар, Боловсролын салбар мөн ахмад настангуудын тэтгэвэртэй холбоотой асуудлыг хэлэлцлээ.

Энэ асуудлын хүрээнд багш нарын цалинг 20 хүртэл хувиар нэмэгдүүлэх боломжийг судлах, эмч нарын цалинг 10-15 хүртэлх хувиар нэмэгдүүлэх боломжийг судлах мөн тэтгэврийг инфляцын түвшинтэй уялдуулах чиглэлээр чиглэл өгөгдсөн.

Үүнийг хийхийн тулд төсвийг ерөнхийлөн захирагч нарын урсгал зардлыг боломжит хэмжээгээр танах, мөн 4,5 дахь өдрийн чуулганаар Монгол Улсын 2026 оны төсвийн тухай хуулийн хоёр дахь хэлэлцүүлэг явуулах эсэх дээр санал хураалт хийнэ. Цалин, тэтгэврийг нэмэх асуудал дээр боломжит хувилбарыг олж УИХ-д дэвшүүлнэ. 

УИХ-ын гишүүн Н.Наранбаатар: Бүлгийн ажил тасралтгүй үргэлжилж байх ёстой. Шийдвэрлэх ёстой тулгамдсан асуудлууд байсаар байхад Ж.Бат-Эрдэнэ дарга үүргээ биелүүлсэнгүй, бүлгээ хуралдуулсангүй. Аравдугаар сарын 9-нд бүлгийн долоон гишүүн бүлгийнхээ хурлыг хийх шаардлага өгсөн ч өнөөдрийг хүртэл хариу өгсөнгүй. Өнөөдөр 16:00 цагийн орчимд Ж.Бат-Эрдэнэ даргын өрөөнд нь очиж уулзаж шаардлагаа хэлсэн ч "Бүлэг хуралдуулах боломжгүй" гэсэн. Гишүүд хүлээгээд орж ирээгүй тул бүлэг хуралдаж олонхийн саналаар үүрэгт ажлаас нь чөлөөлөх шийдвэр гаргасан гэлээ.