Монголын Болосврол, шинжлэх ухааны үйлдвэрчний эвлэлээс 2026 оны аравдугаар сарын 16-наас багш нар орон даяар ажил хаялт зохион байгуулахаа Боловсролын яаманд аравдугаар сарын 9-нд мэдэгджээ. Харин Боловсролын сайд П.Наранбаяр "Багш нар ажилт зарлавал үүссэн хохирлыг Монголын Үйлдвэрчний эвлэл өөрөө хариуцах ёстой, энэ бол хууль бус ажил хаялт болно" гэж мэдэгдэв. Мөн тэрээр улс төрийн ороо бусгаа нөхцөл байдлыг ашиглан заавал энэ цаг үед ажил хаялт зохион байгуулж байгаа нь өөрөө улс төр гэж харж байгаагаа илэрхийллээ.
Боловсролын сайд П.Наранбаяр: Өнгөрсөн долоо хоногт Ерөнхий сайд Г.Занданшатар, Сангийн сайд Б.Жавхлан нар Монголын багш нарын үйлдвэрчний эвлэлийн төлөөллийг хүлээн авч уулзаад 2026 оны төсөвт багш нарын цалинг нэмэх эх үүсвэрийг нэмж, үндсэн цалинг 1.8 сая төгрөгт хүргэх боломжтой гэдгээ илэрхийлсэн. 2026 оны долдугаар сарын 1-нээс төсвийн орлого бүрдүүлэлт сайн байвал багшийн үндсэн цалинг 2.5 сая төгрөгт хүргэх зэргээр үе шаттай нэмж, гурван жилийн дараа үндсэн цалинг 3.5 сая төгрөгт хүргэх боломжтой гэдгээ илэрхийлсэн.
Гэвч Үйлдвэрчний эвлэлээс багш нарын үндсэн цалинг шууд 3.5 сая төгрөг болгохыг шаардаж, аравдугаар сарын 15-наас багш нар ажил хаяна гэдэг мэдэгдлийг ирүүлсэнд харамсаж байна. Энэ нь өнөөдрийн Монгол Улсын эдийн засгийн нөхцөл байдлыг харгалзаж үзээгүй, одоо үүсээд буй улс төрийн нөхцөл байдлыг далимдуулан улс төр хийж байна гэж үзэхээс өөр ямар ч арга алга. Эрх баригч нам дотроо зодоонтой, УИХ, Засгийн газар ажлаа явуулахад ийм хүндрэлтэй үед үүнийг улстөржилт гэж харж байна. Иймээс Үйлдвэрчний эвлэлийг ажил хаялт зарлах шаардлагаа дахин эргэн харахыг хүсэж байна.
Хоёрт аравдугаар сарын 9-нд ажил хаялт зарлах шаардлагаа ирүүлсэн нь өөрөө хуулийн зөрчилтэй. Гурван талт хөдөлмөрийн маргаан үүсэж, хамтын хэлэлцээрийн дагуу ярилцаад, асуудал арбитр дээр явж байхад аль нэг тал нь ажил хаялт хийхгүй гэж Хөдөлмөрийн тухай хуульд заасан байдаг. Тэгэхээр энэ бол хууль бус ажил хаялт юм. Ажил хаялт бол хамгийн эцсийн арга. Үүн рүү орж болдоггүй. Энэ бол Хөдөлмөрийн хуулийг ноцтой зөрчиж байна гэсэн үг. Хэрвээ Хөдөлмөрийн хууль зөрчсөн ажил хаялт руу Монголын багш нарыг оруулбал Монголын Үйлдвэрчний эвлэлийн холбоо өөрөө бүх хариуцлагыг хүлээнэ шүү. Ажил хаялт явснаар хүүхдийн аюулгүй байдал, сургуулийн өмнөх боловсролын аюулгүй байдал яах болж байна вэ, үүнийг хэрхэн хамгаалах юм бэ. Хүүхдийн сурлагын хоцрогдлыг хэн арилгах вэ. Багш нарыг хууль бус ажил хаялт руу оруулбал Монголын боловсролын түүхэнд хар мөр үлдэнэ шүү. Ажил хаялтаас олигтой шийдэл юу ч гарахгүй.
