УИХ-ын гишүүн З.Мэндсайхан, М.Бадамсүрэн тэргүүтэй 67 гишүүн УИХ-ын дарга Д.Амарбаягаланг огцруулах саналыг УИХ-ын дэд дарга Х.Булгантуяад өргөн барьж байгаа талаар мэдээлэл хийлээ.
УИХ-ын нэр бүхий гишүүд УИХ-ын дарга Д.Амарбаясгаланг нэр холбогдсон асуудлаараа хууль хяналтын байгууллагаар шалгуулж, ёс зүйн хувьд УИХ-ын даргын албан тушаалаасаа түдгэлзэн шалгуулахыг шаардсан. Уг шаардлага үр дүнгээ өгөөгүй учраас огцруулах санал гаргаж, нийт УИХ-ын 67 гишүүн гарын үсэг зурж дэмжсэн тул УИХ-ын даргын албан тушаалаас нь огцруулах саналыг хуулийн дагуу өргөн мэдүүлж байна гэж УИХ-ын гишүүн З.Мэндсайхан мэдэгдлээ.
Тэрээр “Ард түмний сонгож байгуулсан нөлөөллийн байгууллагын хувьд ард түмний засаглах эрхийг хангах УИХ-ын үндсэн зорилт, хэвийн үйл ажиллагаанд сөргөөр нөлөөлж, төрийн үйл ажиллагааг тасалдуулж байгааг эрс буруушааж байна. Ард түмний элчийн хувьд нийт иргэн, улсын ашиг сонирхлыг эрхэмлэн төрд ёс түүхт соёлынхоо уламжлалыг хүндэтгэж, Монгол Улсын Үндсэн хуулийг дээдлэн сахиж, авлига, ашиг сонирхлын зөрчлөөс ангид байж УИХ-ын гишүүний үүргээ чин шударгаар биелүүлэх тангаргаасаа няцвал хуулийн хариуцлага хүлээнэ хэмээн төрийн сүлдэндээ тангараг өргөсөн гишүүд бид УИХ-ын дарга Д.Амарбаясгалан таныг Монголын ард түмний сонгож байгуулсан төрийн эрх барих дээд байгууллагыг удирдах улс төрийн болон ёс суртахууны эрхгүй гэж үзэж байсан.
Иймд, Монгол Улсын Үндсэн хуулийн 24.2 дахь хэсэгт заасан УИХ-ын дарга, дэд даргын бүрэн эрхийн хугацаа 4 дөрвөн жил байх бөгөөд хуульд заасан үндэслэлээр хугацаанаас нь өмнө огцруулж, чөлөөлж болно гэж заасныг үндэслэн Д.Амарбаясгаланг УИХ-ын даргын үүрэгт ажлаас чөлөөлж, огцруулах саналыг үүгээр гаргаж байна гэлээ.
