Засгийн газрын ээлжит хуралдаанаас гарсан шийдвэрийг өнөөдөр танилцуулав. Сүүлийн үед хэвлэл мэдээллийн хэрэгслээр, цахим орчинд бензин түлшний тасалдал явагдаж байна гэх мэдээлэл гарсан. Энэхүү мэдээллийг зохион байгуулалттай худал мэдээлэл гэсэн бөгөөд олон нийтэд худал мэдээлэл тарааж, иргэдийг бензинд оочерлуулах үйл ажиллагаа явагдаж байгаа талаар Аж үйлдвэр, эрдэс баялгийн сайд Г.Дамдинням мэдээлэл өглөө.

Тэрээр " Монгол Улсын Ерөнхий сайдын өгсөн үүрэг даалгаврын дагуу худал мэдээллүүдийг түгээж байгаа хаяг болон хүмүүст шалгалт явуулахаар тагнуул, цагдаагийн байгууллагыг явуулах шийдвэр гаргасан. Бид Оросын Холбооны Улсаас 100 хувь шахуу импортын түлш шатахууныг авч хангагддаг. Оросын Холбооны Улсын нөхцөл байдал хүнд байгаа ч өнгөрсөн сард Ерөнхий сайд Орос Улсад хийсэн айлчлалын хүрээнд ОХУ-ын Ерөнхийлөгчтэй уулзсан. Харин миний бие Оросын Холбооны Улсын Эрчим хүчний сайд болон Байгалийн нөөцийн сайд нартай уулзаж асуудлуудыг ярилцсан. Тийнхүү ямар ч нөхцөлд манай улсыг бинзен тосны материалаар таслахгүй. Мөн тэсрэх, дэлбэрэх бодисоор таслахгүй гэх амлалтыг өгсөн юм.

Яг одоогийн байдлаар төмөр зам дээр Толгойт өртөө, Рашаант өртөөд хил даван орж ирж байгаа зөвхөн АИ-92 бензиний хэмжээ гэхэд 150 гаруй тонноор боомт дээр ирж байна. Өдөрт орж ирэх нормоороо орж ирж байгаа. Монгол Улсын хэмжээнд хийгдэж байгаа захиалгууд бүгд хийгдсэн. Манай гол нийлүүлэлтийг хангадаг үйлдвэр нь жил бүр орох ёстой засвартаа орсон. 7 хоногийн дараа засвар нь дуусах болно. Нийлүүлэлтийн хувьд хурдан хэвийн болно гэсэн хүлээлт байгаа.