Засгийн газрын ээлжит хуралдаанаас гарсан шийдвэрийн талаар сайд нар мэдээлэл хийлээ. Хөгжлийн төлөвлөгөөнд тусгагдсан төслүүдийг эрэмбэлж, төрийн нууцад авсан зарим мэдээллийг хэлэлцээд ил болгох ажлыг зохион байгуулахаар болжээ.
Засгийн газрын Хэрэг эрхлэх газрын дарга С.Бямбацогт: Эрдэнэс Тавантолгой ХК-ийн үйл ажиллагаа болон нүүрсний хулгайтай холбоотой олон гэрээг төрийн нууцад хамруулсан асуудал яригддаг. Энэ бүгдийг ил болгох ёстой гэж зарим улстөрч ярьдаг. Өмнө нь буюу 2022 онд Эрдэнэс Тавантолгойтой холбоотой 39 оффтейк гэрээг ил болгосон. Цаана нь зарим мэдээлэл, гэрээ ил болоогүй байгаа учраас эдгээр мэдээлэл, гэрээг ил болгох асуудлыг хэлэлцээд нууцаас гаргаж, ил болгохоор шийдвэрлэлээ. Үүнтэй холбоотойгоор төмөр замын хил холболттой холбоотой бүх гэрээ, хоёр талын хэлэлцээр, албан захидал, хоёр улсын компаниуд хооронд байгуулсан гэрээ буюу Чайна Энержи компанитай байгуулсан гэрээг нууцаас гаргана.
Ер нь үндэсний аюулгүй байдалтай холбоотой мэдээллээс бусад мэдээлэл нийтэд, ард иргэдэд ил тод болох ёстой. Ганцмод-Гашуунсухайт чилэлийн хил холболттой холбоотой гэрээ хэлцэл, удирдамж, чиглэл, хоорондын захидал мэдээлэл, санал солилцсон протокол албан бичгийг ил болно гэсэн үг. Нууцаас гаргасан гэрээ, мэдээллүүдийг Засгийн газрын цахим сайт болон ETT.MN сайтаас авах боломжийг нээж байна. Холбогдох яамдуудад байгаа бүх мэдээллийг мөн ил тод болгохыг үүрэг болгосон гэлээ. Мөн “Эрдэнэс Тавантолгой” ХК-иас бусад хуулийн этгээдтэй 2020-2022 онд “Нүүрс нийлүүлэх гэрээ”-ний хүрээнд байгуулсан нийт 32 гэрээ, тэдгээрт холбогдох мэдээллийг компанийн цахим хуудаст нээлттэй байршуулж, иргэд, олон нийтэд танилцуулах, цаашид байгалийн баялаг, бүтээн байгуулалттай холбоотой гэрээ хэлэлцээрийг ард түмний хяналтад ил тод, нээлттэй зохион байгуулж байхыг холбогдох албан тушаалтнуудад Ерөнхий сайд Г.Занданшатар үүрэг болгосон байна.
