УИХ-ын дарга, Ерөнхий сайд нарын хагарал төрийн хямрал болж, чуулган ч хуралдаж чадахгүй 10 гаруй хонож байна.

Хоёр талаас өдөр бүхэн мэдэгдэл, мэдээлэл хийж байгаа ч ямар нэгэн шийдэлд хүрч чадахгүй, төрийн ажил гацаанд орлоо. Өчигдөр УИХ-ын гишүүн П.Сайнзориг Ерөнхий сайд Г.Занданшатарыг огцруулах бичигт гарын үсэг цуглуулж байгаагаа зарлаж, өнөөдөр өргөн барина гэдгээ мэдэгдсэн бол нөгөө талаас УИХ-ын гишүүн Д.Энхтүвшин УИХ-ын даргыг холбогдоод байгаа асуудлуудаа хууль хяналтын байгууллагуудад шалгуулахыг шаардаж гарын үсэг цуглуулж байгаа аж.

Энэ талаар нь УИХ-ын гишүүн Д.Энхтүвшингээс тодруулахад "УИХ-ын даргыг огцруулах бичиг бишээ, нэр холбогдоод байгаа асуудлуудаа хууль хяналтын байгууллагуудаар шалгуулаач, тэгэхгүй бол үндэсний эв нэгдэл, төрийн тасралтгүй үйл ажиллагаа, ард иргэдийн төрд итгэх итгэлийг сулруулахаар байна гэсэн агуулгатай бичиг байгаа" гэсэн юм.

Хоёр талаас УИХ-ын дарга, Ерөнхий сайдыг огцруулах гарын үсэг цуглуулаад эхэлсэн. Тэгэхээр хэн нь их кноп цуглуулж чадсан нь үлдэнэ. Монголын улс төрийн 30 гаруй жилийн түүхэнд Ерөнхий сайд, Засгийн газрыг огцруулж байсан түүх олон бол УИХ-ын даргыг огцруулж байсан түүх ганцхан бий. Тодруулбал, МАН-ынхан өмнө нь нэг удаа УИХ-ын тухай хуульдаа өөрчлөлт оруулж УИХ-ын дарга М.Энхболдыг огцруулж байсан түүхтэй. 2019 онд МАН-ынхан УИХ-ын даргаа 60 тэрбумын хэрэгт холбогдуулж, УИХ-ын таван гишүүн өвөл Төв талбай дээр жагсаж УИХ-ын дарга М.Энхболдыг огцруулж байсан юм. Тухайн үед УИХ-ын тухай хуульд УИХ-ын даргыг огцруулах таван үндэслэл байсан. Тиймээс УИХ-ын тухай хуульд нэмэлт, өөрчлөлт оруулж, УИХ-ын гишүүд нь даргадаа итгэл үзүүлэхгүй бол гэдэг зүйл заалтыг нэмж, УИХ-ын дарга М.Энхболдыг огцруулж байв.

Харин одоогийн УИХ-ын тухай хуульд УИХ-ын даргыг дараах үндэслэлээр огцруулахаар заажээ.

12 дугаар зүйл.Улсын Их Хурлын даргын бүрэн эрхийн хугацаа, түүнийг хугацаанаас нь өмнө чөлөөлөх, огцруулах

12.1.Улсын Их Хурлын даргын бүрэн эрхийн хугацаа дөрвөн жил байх бөгөөд түүнийг хуульд заасан үндэслэлээр хугацаанаас нь өмнө чөлөөлж, огцруулж болно.

12.2.Улсын Их Хурлын даргын бүрэн эрх энэ хуулийн 45 дугаар зүйлд заасны дагуу гишүүний бүрэн эрхийг нь түдгэлзүүлсэн, 9 дүгээр зүйлд заасны дагуу гишүүний бүрэн эрх нь дуусгавар болсноос гадна дараах тохиолдолд хугацаанаасаа өмнө дуусгавар болно:

12.2.1.Улсын Их Хурлын даргын үүрэгт ажлаасаа чөлөөлөгдөх хүсэлтээ өөрөө гаргасныг Улсын Их Хурал хүлээн авсан;

12.2.2.Монгол Улсын Үндсэн хуулийн цэц Улсын Их Хурлын даргыг огцруулах үндэслэлтэй гэсэн дүгнэлт гаргасныг Улсын Их Хурал хүлээн зөвшөөрсөн;

12.2.3.Улсын Их Хурлын нийт гишүүний олонх Улсын Их Хурлын даргыг огцруулах үндэслэл бүхий санал гаргасныг Улсын Их Хурал хүлээн зөвшөөрсөн.

12.3.Улсын Их Хурлын даргыг чөлөөлөх, огцруулах асуудлыг Төрийн байгуулалтын байнгын хорооны санал, дүгнэлтийг үндэслэн нэгдсэн хуралдаанаар хэлэлцэж, чөлөөлөх, огцруулах асуудлыг ил санал хураалтаар шийдвэрлэнэ. Улсын Их Хурлын даргыг чөлөөлөх, огцруулахыг хуралдаанд оролцсон гишүүдийн олонх дэмжсэн бол энэ тухай тогтоол баталсанд тооцно.

Ерөнхий сайд Г.Занданшатар, УИХ-ын дарга Д.Амарбаясгалангийн талынхан хоёр талд гарын үсэг цуглуулаад эхэлсэн нь асуудлыг улам хурцатгаж байна. Энэ үйл явдлын төгсгөлд УИХ-ын дарга ч, Ерөнхий сайд ч огцрох эрсдэлтэй. Хуульд УИХ-ын дарга, Ерөнхий сайдыг огцруулахад нийт гишүүдийн 50 хувь дээр + нэг буюу 64-өөс дээш дэмжвэл хоёулаа огцрох хуулийн зохицуулалттай.