УИХ-ын 35 гишүүн УИХ-ын дарга Д.Амарбаясгаланг ёс зүйн манлайлал үзүүлж албан тушаалаасаа огцорч, нэр холбогдсон хэргээ шалгуул гэдэг шаардлага хүргүүлж байгаа талаар мэдээлэл хийлээ. УИХ-ын дарга бол Монгол Улсын Үндэсний аюулгүй байдал, тусгаар тогтнол, эв нэгдлийг илэрхийлэгч. Иймд Д.Амарбаясгаланг нүүрс түүнтэй холбоотой авлига, албан тушаалын хэргийг шалгуулж, нэрээ цэвэрлэтэл УИХ-ын дарга хэмээх энэ албан тушаалаа хаших эрхгүй гэж үзэж байгаа аж.

УИХ-ын гишүүн Энхтүвшин: Сүүлийн үеийн улс төрийн нөхцөл байдлаас болоод үндэсний эв нэгдэл, төрийн үйл ажиллагаа тасалдахгүй явах, ард иргэдийн төрд итгэх итгэлийг сулруулж байна. Иймээс УИХ-ын даргад ёс зүйн шаардлага тавьж байна. Энэ нь анх даа тавьж байгаа шаардлага биш. Өмнө нь Монгол Улсын өмнөх Ерөнхий сайд, намын дарга энэ асуудлыг Д.Амарбаясгалан даргад тавьж байсан. Мөн АН-ын бүлэг хуралдаж нэр холбогдож байгаа асуудлаа шалгуулаач, тэр болтол УИХ-ын чуулганыг даргалах нь нийцэхгүй гэдэг шаардлага тавьсан. Энэ шаардлагыг МАН-ын бүлгийн гишүүд зөв зүйтэй гэж үзэж байна. Нийгэмд тодорхойгүй байдал үүсгэх нь наанадаж намын, хувь хүнийх нь хувьд, цаанадаж улс эх орны асуудал байгаа учраас өөрөө саналаараа асуудлаа шалгуулаач гэдэг орон зайг өгч байна. Тэрнээс огцруулах бичиг хүргүүлээгүй.

УИХ-ын гишүүн Д.Үүрийнтуяа: УИХ-ын гишүүн гэдэг ард түмний элч байдаг. Бид УИХ-ын гишүүнээр сонгогдоод, тангараг өргөхдөө Монгол Улсын нийт ард иргэд, үндэсний эрх ашиг, улсын тусгаар тогтнолын төлөө Үндсэн хуулийг эрхэмлэн сахиж авлига, ашиг сонирхлын аливаа зөрчлөөс ангид байна гэж тангараг өргөсөн. Тийм учраас Монгол Улсын Их хурлын гишүүний хувьд авлига, ашиг сонирхлын асуудалтай холбогдож нүүрсний хулгайн зохион байгуулалттай хэрэгт оролцсон байх магадлалтай гэж нэр холбогдож байгаа УИХ-ын даргад бид зарчмын шаардлага, хүсэл эрмэлзлийг илэрхийлсэн албан бичгийг хүргүүлж байна. УИХ-ын дарга Д.Амарбаясгалан энэ хэрэгт ямар нэгэн байдлаар холбоогүй эсвэл холбогдсон гэдгийг Монгол Улсын шүүх тогтоох ёстой. Энэ шүүхээр тогтоох процессыг шударга, хууль тогтоомжийн дагуу явуулахын тулд УИХ-ын гишүүн болон даргынхаа бүрэн эрхээс түдгэлзээд, шалгуулаач гэж байгаа юм. Авлигатай тэмцэх шударга ёсны зарчимд манлайлалтай хандаж өөрийнхөө нэр төрийг сэргээх, шалгуулах ажилд манлайллаа үзүүлэх байх гэж найдаж байна. Үндсэн хуулиар УИХ-ын дарга гэдэг Монгол Улсын Ерөнхийлөгчийг эзгүйд орлох эрхтэй субъект. Өөрөөр хэлбэл, Монгол Улсын Үндэсний аюулгүй байдал, тусгаар тогтнол, эв нэгдлийг илэрхийлэгч албан тушаалтан.