Сайжруулсан түлшинд олгож байсан татаасыг ашиглан энэ жил 306 мянган тонн хагас кокс, мөн 40 мянган тонн сайжруулсан түлшийг нийлүүлэхээр нийслэлээс төлөвлөсөн. Хагас коксын талаар тайлбар өгөхдөө нүүрсний боловсруулалтын хамгийн сүүлчийн шатны бүтээгдэхүүн бөгөөд хорт бодис, хүнд металл, тоосонцрыг шүүн цэвэрлэсэн гэж мэдээлсэн юм. Хагас коксыг хэрэглэснээр нийслэлийн агаарын бохирдлыг 40-45 хувиар бууруулах боломжтой гэж үзсэн байна. Тэгвэл хагас коксон түлш хэрэглэхээр болсонд иргэд ямар байр суурьтай байгааг сурвалжиллаа.

НЗД-ын орлогч А.Амартүвшин: Улаанбаатар хотын хэмжээнд өнөөдрийн байдлаар 172 мянган өрх нүүрс хэрэглэж байна. Энэ тоо нь өмнөх жилүүдийн үзүүлэлттэй харьцуулахад мэдэгдэхүйц өссөн гэж хэлж болно. Өмнөх жилүүдэд сайжруулсан түлшинд олгож байсан татаасыг ашиглан энэ жил 306 мянган тонн хагас кокс, мөн 40 мянган тонн сайжруулсан түлшийг нийлүүлэхээр төлөвлөсөн. Ингэхдээ улсын болон нийслэлийн төсвөөс нэмэлт зардал гаргахгүйгээр зөвхөн өмнөх татаасын хүрээнд санхүүжилт хийсэн. Галлагааны улирал есдүгээр сарын 15-наас эхэлнэ. Энэ өдрөөс нийслэлийн 400 борлуулалтын цэгээр сайжруулсан түлш худалдаанд гарч, аравдугаар сарын 1-нээс хагас коксын борлуулалт эхлэх юм. Энэ жил борлуулалтын цэгүүдийг зөвхөн зориулалтын газарт байрлуулж, машин зам дагуух болон явган хүний зам дээр нүүрс худалдахыг зогсоож байна.

Хагас коксыг хэрэглэснээр нийслэлийн агаарын бохирдлыг 40-45 хувиар, зохион байгуулалт сайн байвал 50 хувь хүртэл бууруулах боломжтой гэж үзэж байна. Шинжилгээ, судалгааны дүнгээр хагас кокс нь ахуйн хэрэглээнд тохиромжтой, нүүрсний боловсруулалтын хамгийн сүүлчийн шатны бүтээгдэхүүн бөгөөд хорт бодис, хүнд металл, тоосонцрыг шүүн цэвэрлэсэн гэж эрдэмтэд үзсэн. Ууталгаа савлагааг ч мөн цаасан материалаар хийж, түлшний хамт шатаах боломжтой байхаар зохион байгуулсан тул хог хаягдал үүсгэхгүй. Нэг уут хагас коксын үнэ 5000 төгрөгөөр худалдаална.