МАН-ын даргын төлөөх хагарал улам гүнзгийрч Засгийн газраа унагах хэмжээнд хүрэв. Тодруулбал, УИХ-ын гишүүн П.Сайнзориг Ерөнхий сайд Г.Занданшатарыг огцруулах гарын үсгийг өөрийнхөө албан бланк дээр цуглуулж эхэлсэн бөгөөд 40 гаруй гишүүн гарын үсэг зураад байгаа гэсэн мэдээлэл бий. Тэгвэл П.Сайнзориг гишүүн өнөөдөр 10:00 цагт энэ асуудлаар мэдээлэл хийх юм байна.
Үндсэн хуульд зааснаар нийт гишүүдийн олонх буюу 64-өөс дээш гишүүн уг саналыг дэмжвэл Засгийн газар огцрохоор хуульд заасан. Тодруулбал, Үндсэн хуулийн 33 дугаар зүйлд "Улсын Их Хурлын гишүүдийн дөрөвний нэгээс доошгүй нь Ерөнхий сайдыг огцруулах саналыг албан ёсоор тавибал Улсын Их Хурал гурав хоногийн дараа хэлэлцэж эхлэн арав хоногийн дотор шийдвэрлэнэ. Улсын Их Хурлын нийт гишүүний олонхи уг саналыг дэмжсэн бол Ерөнхий сайдыг огцруулах тухай Улсын Их Хурлын тогтоол баталсанд тооцож, шинэ Ерөнхий сайдыг гуч хоногийн дотор томилно" гэж заасан байдаг.
МАН хоёр хуваагдсан энэ үед Засгийн газарт хамтраагүй Ардчилсан намын гишүүдийн кноп үнэд хүрч, Засгийн газрын хувь заяаг шийдэх үнэ цэнтэй болов. Учир нь нам, УИХ дахь бүлэг нь хоёр хуваагдсан энэ үед Засгийн газарт хамтарсан ХҮН, ИЗНН-ынхныг нэмээд ч Г.Занданшатар Ерөнхий сайд танхимаа хамгаалж үлдэж чадахгүй. Тиймээс Засагт хамтраагүй Ардчилсан намынхны дэмжлэг, кноп зайлшгүй хэрэгтэй.
