Сангийн сайд Б.Жавхлан валютын нөөц болон улсын төсвийн талаар мэдээлэл хийж байна.

УИХ-ын гишүүн П.Сайнзориг өнөөдөр мэдээлэл хийлээ валютын нөөц хасах руугаа орж, Монгол Улс дефолт зарлах хэмжээнд хүрсэн хэмээн мэдэгдсэн билээ. Тус мэдээлэлтэй холбоотойгоор Сангийн сайд Б.Жавхлан мэдээлэл хийлээ. Мөн тэрээр аравдугаар сар гарчихсан байхад төсвийнхөө хоёрдугаар хэлэлцүүлгийг эхлүүлээгүй, ажлын хэсгээ байгуулаагүй байгаа нь маш их эрсдэлтэй гэдгийг хэлж, энэ 7 хоногт төсвийн хэлэлцүүлгээ үргэлжлүүлэхийг уриаллаа.

Монгол Улсын валютын нөөц 5 тэрбум 874 сая ам.доллар байна, төрийн сангийн үйл ажиллагаа хэвийн явж байгааг хэллээ. Мөн ОУВС манай улсад ирж ажиллаад явсан бөгөөд эрсдэлгүй хэмээн дүгнэсэн гэдгийг хэллээ.

Тэрээр “Монгол Улсын төрийн сангийн үйл ажиллагаа хэвийн явж байна. Хаана ч ямар ч саатсан зүйл байхгүй. Энэ жилийн хувьд төсвийн хөрөнгө оруулалтын гүйцэтгэл 50 гаруй хувьтай байна. Олон жилийн дунджаар III  улиралд энэ орчимд байдаг. Мөн би сая Монголбанк болон Үндэсний статистикийн газраас сүүлийн үеийн мэдээллийг авлаа. Есдүгээр сарын байдлаар манай улсын валютын нөөц 5 тэрбум 874 сая ам.доллар байна. Энэ бол 4-5 сарын импортын хэрэгцээг хангах дүн. Жилдээ хоёр удаа ОУВС-аас улс орнуудад очиж ажилладаг. Манай улсад ОУВС-ийн баг ирээд явлаа. Ямар нэгэн эрсдэлтэй зүйл байхгүй гэдгийг дүгнээд явсан. Би ирэх 7 хоногт ОУВС-гийн хуралд явна. Хэрвээ шаардлагатай бол сэтгүүлчид явж болно. Мөн П.Сайнзориг гишүүн өөрөө цуг яваад Монгол Улсыг олон улсад хэрхэн харж байгааг харах хэрэгтэй. Төрийн сангийн үйл ажиллагаа, валютын нөөцийн асуудлыг хэн дуртай нь гарч ирж улстөржүүлээд, цээжнийхээ бангаар ярьж болохгүй. Маш эмзэг асуудал шүү. Энэ сайн үзүүлэлтүүдээ цаашдаа хэрхэн хадгалах вэ гэдэг нь бидний хариуцлагын асуудал. Бид төсвөө есдүгээр сарын 1-нд өргөн барьсан. Харамсалтай нь хэлэлцэхгүй байна. Энэ 7 хоногт төсвийн хоёр дахь хэлэлцүүлгийг эхлүүлээд ажлын хэсгийг байгуулаасай гэж хүсэж байна. Мөн уриалж байна. Улсын төсөв гэдэг бол тухайн улсын эдийн засгийн толь байдаг. Ирэх жилийн төсөв хэрхэн батлагдахаас эдийн засгийн бүх оролцогчид төлөвлөгөөгөө гаргана. Гэтэл аравдугаар сар гарчихаад байхад төсвийн хоёрдугаар хэлэлцүүлгээ хийгээгүй байгаа нь маш их эрсдэлтэй болж байна. Арваннэгдүгээр сарын 15 гэхэд төсвөө баталсан байх ёстой. Ажлаа хийцгээе” гэсэн юм.