Коннект Лайф компани үүрэн холбооны Мобиком корпорацитай хамтран Хүртээмжтэй хорт хавдрын даатгалын шинэ бүтээгдэхүүнийг зах зээлд нэвтрүүлэхээр болжээ. Тэд эхний гурван жилд нийт 200 мянган хэрэглэгчийг хамруулах зорилт тавьсан бөгөөд тэдгээрийн 10 хувь буюу 20 мянга гаруй хүн хамгаалалтаа нэмэгдүүлж шинэ бүтээгдэхүүнд шилжих боломжтой болох юм.

Шинэ бүтээгдэхүүний онцлог нь олон улсын жишигт нийцсэн “Graduated Benefit Structure” буюу хугацааны шатлалтай нөхөн төлбөрийн систем нэвтрүүлэх аж. Энэ систем нь даатгалын сангийн тогтвортой байдлыг хангах, нийт даатгуулагчдын эрх ашгийг тэнцвэртэй хамгаалах, даатгал нэртэй залилангаас сэргийлэх зорилготой.

Даатгалын бүтээгдэхүүн нь бүх төрлийн хорт хавдрыг хамруулах боломжтой бөгөөд илүү өргөн хүрээтэй хамгаалалтыг санал болгож байна. Хэрэглэгч дижитал сувгаар 50 сая төгрөг хүртэл хамгаалалттай даатгалд хамрагдах боломжтой болсноор хүртээмжийг улам нэмэгдүүлжээ. Мөн компанийн брэнд карт ашиглан зургаан сарын турш нөхөн төлбөрөө авах шинэ боломж нээгдэж байна.

Монгол Улсад хорт хавдрын шинэ тохиолдол жилээс жилд нэмэгдэж буйгийн цаана эрсдэлээс хамгаалсан бүтээгдэхүүн, үйлчилгээ шаардлагатайг харуулж байгаа юм. 2010 онд жилд 4-5 мянга байсан хорт хавдрын шинэ тохиолдол 2024 онд 8 мянга давжээ. Хорт хавдраар оношлогдсон хүмүүсийн гуравны нэг нь хөдөлмөрийн насны буюу 55-аас доош насныхан байгаа нь өрхийн орлогын алдагдал, амьдралын чанарын бууралтад хүргэж байна. Эмчилгээний зардал ч иргэдэд томоохон дарамт болж байгаа бөгөөд хавдрын улмаас нэг өрх жилд дунджаар 4-80 сая төгрөг зарцуулж байгаа нь дундаж орлоготой айл өрхөд маш хүнд ачаалал болж байна. Ийм нөхцөлд хорт хавдрын даатгал нь нэмэлт хамгаалалт болж, иргэдийн санхүүгийн тогтвортой байдлыг дэмжих ач холбогдолтой юм.