УИХ дахь АН-ын бүлэг цаг үеийн асуудлаар мэдээлэл хийлээ. Ардчилсан намын Улс төрийн зөвлөлөөс УИХ дахь АН-ын бүлэгт хоёр асуудлаар чиглэл өгсөн байна. Тодруулбал, УИХ-ын даргын ёс зүйн болон улсын төсөв эзэнгүйдэж байгаа асуудлаар байр суурь илэрхийлж, шийдвэр гарга гэсэн байна.

УИХ-ын гишүүн Х.Тэмүүжин: Хууль тогтоогчдын хувьд нүүрсний хулгайн хэрэгтэй холбогдсон намын дарга болж байгаа хүн парламентыг удирдах зохимжгүй байна. Тийм учраас Д.Амарбаясгалан УИХ-ыг даргалж, индэр дээрээс намын даргын сонгууль болон хэл амтай холбоотой асуудлаа шийдэх гэж оролдвол сонирхлын зөрчил үүсэх учраас АН парламентыг удирдуулахгүй. Ийм асуудалтай парламентын хэлэлцүүлэгт оролцохгүй шүү гэдэг шийдвэрийг бүлэг рүү өгсөн. УИХ-ын АН-ын бүлэг хуралдаад МАН-ын даргатай холбоотой асуудлаа эцэслэж дуустал, нөгөөтээгүүр энэ асуудалтай холбоотой ядаж олон нийт итгэхүйц тайлбар өгөх хүртэл Д.Амарбаясгалан УИХ-ын дарга индэр дээр суух зохимжгүй байна гэдэг асуудал яригдсан.

Хоёрдугаарт, төр засаг эзгүйдчихлээ. Ямар ч яам, төрийн байгууллага ажил хийхгүй хүлээлтийн байдалд орчихлоо. Гэтэл энэ цаг үед төсөв хэлэлцэж байна. УИХ-д орж ирж байгаа сайд нар ч итгэл үнэмшилгүй, ажилдаа хариуцлагагүй хандаж байна. Тийм учраас эзэнгүй төсөвтэй холбоотой асуудлаа буцааж тат эсвэл шийд. Багш нар цалин,  ахмадууд тэтгэвэр нэмэхийг шаардаж байна. Бизнес эрхлэгчид төрийн данхайсан бүтцээ хязгаарлаж, боломж олгохыг шаардаж байна. Гэтэл энэ шаардлагуудад ямар ч хариу байхгүй төсөв оруулж ирснээ ард нь эзэн алга.