Монгол Улсын Засгийн газрын ээлжит хуралдаанаас гарсан шийдвэрийг танилцууллаа. Томуугийн вакцинжуулалттай холбоотой мэдээллийг Эрүүл мэндийн сайд Ж.Чинбүрэн өгсөн юм. 

Тэрээр “Ард иргэдийн томуугийн вакцинд хамрагдалт маш сайн байна. Есдүгээр сарын 30-ны байдлаар 60 хувьтай хамрагдсан байгаа нь урьд өмнө байгаагүй амжилт юм. Нийт зургаан сартайгаас таван настай хүртэл 160 мянган хүүхдэд вакцин хийх шаардлагатайгаас 96 мянга нь хамрагдсан байна. Жирэмсэн эмэгтэйчүүдийн 2320 нь вакцин хийлгэх шаардлагатайгаас 62 хувь нь хийлгэсэн байна. 65 наснаас дээш 62 мянган өндөр настан вакцин хийлгэх шаардлагатайгаас 50 хувь нь хийлгэсэн байна. Мөн эмнэлгийн байгууллагын 30 мянган эмч вакцинд хамрагдах ёстой. Үүнээс 36 хувь нь хамрагдсан байна. Харьцангуй бага хувьтай байгаа тул идэвхжүүлэлт хийгдэх болно. Бага ангийн 8600 багш вакцинд хамрагдах ёстойгоос 100 хувь хамрагдсан байна. Архаг хууч өвчтэй 32 мянган иргэдийн 72 хувь нь вакцинд хамрагдсан байна. Вакцинд хамрагдсан сайн жишээг дурдвал Сэлэнгэ аймаг 97 хувьтай, Архангай 90 хувьтай, Дархан 77 хувьтай байна. Хамрагдалт муутай аймгууд нь Баян-Өлгий 20 хувьтай, Говьсүмбэр 22 хувьтай, Ховд аймаг 35.2 хувьтай байна. Тиймээс эрүүл мэндийн байгууллагууд үүн дээр анхаарч өгөхийг хүсэж байна. 

Энэ болгоныг хэлж байгаа санаа нь вакцинжуулалтад хамрагдсанаар ханиад томуу хүндрэхгүй, эмнэлэгт хэвтэх шаардлагагүй, хатгаа болохгүй байж, эрсдэл буурах юм. Энэ нь мөн эрүүл мэндийн салбарын ачааллыг бууруулах чухал үүрэгтэй. Хичээл сургууль эхэлж олон хүүхдүүд цугласнаар есдүгээр сард улаанбурханы өвчлөл өндөр байх эрсдэл байсан. Гэвч есдүгээр сард улаанбурханы тохиолдол зарим өдөртөө 1-2 тохиолдол бүртгэгдсэн. Тиймээс аравдугаар сард улаанбурханы давлагаа үүсэхгүй байх магадлалтай болж байна. Хүйтний улирал эхэлж байгаа тул хүн тус бүр эрүүл мэндээ анхаарахыг уриалж байна. Томуугийн үеэр коридорт хүүхдийг байлгахгүй гэсэн том зорилт тавьсан. Бид зөвхөн ор бэлдээд байгаа юм биш. Одоо хийгдэж буй дархлаажуулалтын аяныг чухалд тооцож байна.