ТЭЦ-3-д өнгөрсөн зургадугаар сард системийн хэмжээнд нөлөөлөхүйц осол гарсан билээ. Үүссэн нөхцөл байдалтай холбогдуулсан Засгийн газраас тус станцад Онцгой дэглэм тогтоож, сэргээн босголтын ажлыг хариуцах Бүрэн эрхэт төлөөлөгчөөр Н.Тавинбэхийн томилсон. ТЭЦ-3 дээр гарсан аваар ослын уршгийг арилгаж, хэвийн хэмжээнд оруулах, сэргээн босголтын хүрээнд 5 багц ажлыг хийхээр төлөвлөснөөс гурвыг нь энэ ондоо багтаах, хоёрыг нь ирэх онд дуусгахаар төлөвлөсөн. Энэ багц ажлын хэрэгжилтийн явцын талаар Бүрэн эрхт төлөөлөгч Н.Тавинбэх мэдээлэл өглөө.
Тэрээр “Энэ оны өвлийн их ачааллаас өмнө гурван багц ажлыг хийж гүйцэтгэх ёстой. Өнөөдрийн байдлаар гурван багц ажлын гүйцэтгэл 90 хувьтай байна. Энэ жил хийгдэх ёстой гурван ажил бүрэн хийгдэж дуусвал ТЭЦ-3 дулааны үйлдвэрлэлийг өнгөрсөн оны оргил ачааллын үед үйлдвэрлэж байсан хэмжээнд, цахилгаан эрчим хүчний үйлдвэрлэлийг өнгөрсөн онд үйлдвэрлэж байсан түвшингээс 50 орчим хувьд дүйцэхүйц хэмжээнд үйлдвэрлэл явуулж, хэрэглэгчдэд нийлүүлэх техникийн боломж бүрдэнэ.
Үлдсэн хоёр ажлыг 2026 оны өвлийн их ачааллаас өмнө дуусгахаар төлөвлөн ажиллаж байна. Үүнд, шинэ тоног төхөөрөмж, турбагенераторийг үйлдвэрлэх, тээвэрлэх, угсрах, тохируулах хугацааг үндэслэн гарч байгаа гарцаагүй нөхцөл байдал юм.
Засгийн газраас шуурхай арга хэмжээ авч, сэргээн босголтын ажилд шаардлагатай санхүүжилтийг бүрэн шийдэж, эрх зүйн зохицуулалтыг мөн тодорхой болгосон. Энэ хүрээнд сэргээн босголтын ажил богино хугацаанд үр дүнтэй урагшилж байна.
