Ерөнхий сайд Г.Занданшатар өнөөдөр 15.00 цагт мэдэгдэл хийсэн бөгөөд энэ үеэрээ Хууль зүй дотоод хэргийн сайдаар Б.Энхбаярыг томилж байна гэж мэдээлсэн. Үүний араас Ерөнхий сайдын Үндсэн хууль зөрчсөн, зөрчөөгүй гэх маргаан нийгмийн сүлжээнд гараад байна.

УИХ-ын гишүүн Д.Сайнзориг гэхэд Монгол Улсын Ерөнхий сайд Г.Занданшатарыг Үндсэн хууль удаа дараа зөрчлөө гэж нүүр номоороо дамжуулан тайлбар гаргажээ.

Тэрээр “Монгол Улсын Үндсэн хуулийн Гучин есдүгээр зүйлийн 4-т зааснаар Засгийн газрын гишүүнийг УИХ, Ерөнхийлөгчид танилцуулснаар Ерөнхий сайд томилж, чөлөөлж, огцруулдаг. Засгийн газрын гишүүн УИХ-д тангараг өргөдөг байхаар хуульчилсан. Өнөөдөр Ерөнхий сайдын мэдэгдэл дээрх Монгол Улсын Үндсэн хуулийн заалтыг зөрчлөө. Тэгэхээр Б.Энхбаяр гишүүн ХЗДХ-ийн сайдаар томилогдож бүрэн эрх үүсээгүй тул Л.Мөнхбаатар сайд хэвээрээ гэж ойлгох хэрэгтэй. Засгийн газар 2025 оны 8 дугаар сарын 20-ны өдрийн тогтоолоор АМНАТ холбоотой журам баталж бас Монгол Улсын Үндсэн хууль зөрчсөн. Монгол Улсын Үндсэн хуулийг ягштал мөрдөж, төрийн албан тушаалтны үйл ажиллагаа Монгол Улсын Үндсэн хуульд бүрнээ нийцсэн байх ёстой. Монгол Улсын Үндсэн хууль бол ардчилал, хууль ёсны баталгаа. Үүнийг ингэж гажуудуулмааргүй байна. Харамсалтай” гэжээ.