УИХ дахь МАН-ын бүлгийн өнөөдөр /2025.09.29/-ийн хуралдаанаар дараах асуудлыг хэлэлцэж байна.
Онтрэ компанийн хөрөнгө оруулалтын гэрээ
Тамхины хяналтын тухай хуульд нэмэлт, өөрчлөлт оруулах тухай хуулийн төсөл
Хөдөө аж ахуйн тухай хуулийн төслийг хэлэлцэж байна.
“Онтрэ” компанийн гэрээний хүүг шийдвэрлэхэд тун бага хугацаа үлдлээ
УИХ-ын гишүүн, Оюу толгойн Хянан шалгах түр хорооны дарга О.Батнайрамдал Онтрэ компанийн хөрөнгө оруулалтын гэрээний талаар бүлгийн хуралд танилцууллаа. Оюу толгой стратегийн бүлэг ордын хил заагт орших Онтрэ компанийн эзэмшил “Жавхлант", "Шивээ толгой" ашиглалтын тусгай зөвшөөрлийн талбайг ашиглахад Монгол Улсын Үндсэн хууль, бусад хууль тогтоомжид нийцүүлэх, тэдгээрийн шаардлагыг хангуулах, түүнчлэн Оюутолгойн дахин тодотгосон хувь нийлүүлэгчийн гэрээнд заасан зээлийн хүүг хэлэлцэн бууруулах боломжит хугацаа 2025 оны сүүлээр дуусч байгаатай холбогдуулан, уг асуудлыг хэлэлцэн шийдвэрлэх талаар Засгийн газрын ажлыг эрчимжүүлэх шаардлагатай байгаа гэв.
Оюутолгойн зээлийн хүүг бууруулах шалтгаан
Долоон жил тутам зээлийн хүүг бууруулах гэрээнд заасан хугацаа 2025.12.31-нд дуусна.
Оюу толгой төслийн эрсдэл өндөр үед зээлийн хүү 2009 онд 11.1 хувь байсан бол одоо эрсдэл 0 хувь болсон.
Оюу толгой нэг гараараа Онтрэд 6.7 хувийн хүүтэй, нөгөө гараараа толгой компанидаа 11.1 хувийн хүүтэй зээлийн хүү төлдөг.
Рио Тинто олон улсын зах зээлээс 4-5 хувийн хүүтэйгээр зээл авдаг атлаа Оюу толгойд 11.1 хүүтэйгээр зээл өгдөг.
Оюу толгой төслийг том зургаар нь авч үзвэл өнгөрсөн 16 жилийн хугацаанд дэлхийн хэмжээний бүтээн байгуулалтад 26 тэрбум ам.долларыг зарцуулсан. Энэ хөрөнгө оруулалтын 20 тэрбум нь зээлийн санхүүжилт. Өөрөөр хэлбэл, өнөөдрийг хүртэл 20 тэрбум ам.долларын зээл авсан, үүний 12 тэрбум ам.доллар нь хувь нийлүүлэгчдийн зээл. Анх авсан зээлээ эргэж төлөөд, 2010 оноос хойш 6.1 тэрбум ам.долларын зээлийг “Рио Тинто” компаниас Оюу толгой авсан. Үүний хүүгийн хүү нь өнөөдөр тооцогдож, бодогдож явсаар 12 тэрбум ам.долларт хүрсэн. Анх авсан зээл нь 6.1 тэрбум, харин зээлийн тэн хагас нь буюу зургаан тэрбум ам.доллар хүүгийн хүү байна. Анх өндөр хүүтэй зээл авсан нь өнөөдөр ийм байдалд хүрчихээд байгааг хэллээ. Гишүүдийн асуултаар хурал үргэлжилж байна.
Эх сурвалж: УИХ дахь МАН-ын бүлэг
