Галлагааны аюулгүй байдал болон гаарын хийн хордлогын асуудлаар Нийслэлийн агаарын бохирдолтой тэмцэх газар болон НОБГ-аас мэдээлэл хийлээ.
Нийслэлийн агаар орчны бохирдолтой тэмцэх газрын дарга Д.Мөнхбаатар: Нийслэлийн хэмжээнд есдүгээр сарын 1-ээс одоог хүртэл угаарын 49 дуудлага бүртгэгдсэн. Энэ дуудлагуудад 152 иргэн угаарын хийн хордлогод өртсөн гэдэг тоо мэдээлэл байна. Шалтгаан нөхцөлөөр нь ангилбал 2 нь яндангаа хөөлөөгүй, зуухны битүүмж алдагдсан 7, бороотой байх үеэр яндангаа салгаж өрхөө бүтээсэн 35 өрх байна. Түүнчлэн, зуух, яндан гэмтсэн 3, яндан, халаалт, сойлт хаасан 2 өрх зэрэг байгаа юм. Мөн энэ 49 айлаас 38 нь угаарын хийн мэдрэгчгүй байсан. Сүүлийн өдрүүдэд НЭМҮТ-өөс таван иргэн угаартаж нас барсан гэдэг буруу ташаа мэдээлэл олон нийтэд түгээлээ. Учир нь Сонгинохайрхан болон Налайх дүүрэгт гурван иргэн амь насаа алдсан. Харин хоёр иргэн гал түймэрт өртөж нас барсан. НЭМҮТ-ийг хариуцлагатай байхыг уриалж байна.
Иргэд зөв галлах, яндан пийшингээ хөөлөх, бүрэн бүтэн байдлыг хангахыг зөвлөж байна. Халуунаас сэрүүн улиралд шилжиж байгаа үед угаарын хий хамгийн их гардаг. Иргэдийг ОБЕГ болон Нийслэлтэй хамтран аюулгүй байдлаа хангахыг уриалж байна. Алдаж болохгүй хариуцлага гэж байдаг. Угаарын хий нь өнгөгүй, амтгүй, үнэргүй байдаг. Зуух, янданд жижиг хэмжээний гэмтэл үүсэхэд л угаарын хий ялгардаг. Бүх зүйлийг шатаахад угаарын хий бага хэмжээгээр үүсдэг. Гагцхүү угаарын хий их, бага хэмжээгээр гэдгээсээ хамаардаг. Түүхий нүүрсэнд угаарын хий 9800 орчим байдаг. Шахмал түлшний угаарын хий 7800-10700 орчим байдаг.
НОБГ-ын Гамшгаас урьдчилан сэргийлэх хэлтсийн дарга Д.Хадбаатар: Нийслэлийн хэмжээнд 2025 он гарснаар объектын гал түймэр 1942 мэдээлэл бүртгэгдээд байна. Гал түймрийн дуудлагаар Онцгой байдлын албан хаагчид ажиллаж иргэн, ААН, байгууллагын 260 гаруй тэрбум төгрөгийн хөрөнгийг авран хамгаалсан. Угаартаж болзошгүй 2800 гаруй иргэнийг гал түймрийн голомтоос амь насыг нь аварсан. Гал түймрийн улмаас 2025 онд 18 хүн түлэгдэж, 19 иргэн амь насаа алдсан статистик мэдээлэл байна. Галлагаа эхэлж байгаатай холбогдуулан НЗДТГ, НОБГ хамтран гэр хорооллын айл өрхийг гал түймэр, угаарын хийн хордлогоос урьдчилан сэргийлэх чиглэлээр “Сэргийлье, хамгаалъя” арга хэмжээг есдүгээр сарын 22-ны өдрөөс эхлүүлэн ажиллаж байна.
