НИТХ нийслэлийн 2025 оны төсвийг батлахдаа Авто тээврийн болон өөрөө явагч хэрэгслийн албан татварын хувь хэмжээ болон авто зам ашигласны төлбөрийн хэмжээг шинэчлэн батлах тухай тогтоолын төслийг хамт баталсан. Ингэхдээ тээврийн хэрэгслийн албан татварыг 3, авто зам ашигласны төлбөрийг 5 дахин нэмэгдүүлэхээр тусгасан юм. Тухайлбал, зам ашигласны төлбөрт суудлын машин 20 мянган төгрөг төлж байсныг 100 мянган төгрөгийн татвар төлдөг болгосон юм. Тэгвэл Төсвийн байнгын хорооны өчигдрийн /2025.09.25/ хуралдаанаар иргэн Э.Батбаярын гаргасан Улаанбаатар хотын тээврийн хэрэгслийн татварын нэмэгдлийг цуцлахтай холбоотой өргөдлийг судалжээ. Ингэхдээ Ажлын хэсгээс НИТХ-аас гаргасан Авто тээврийн болон өөрөө явагч хэрэгслийн албан татварын хувь хэмжээ болон авто зам ашигласны төлбөрийн хэмжээг шинэчлэн батлах тухай тогтоолын төсөл нь НИТХ-ын хуулийн хүрээнд гаргасан шийдвэр байна гэж дүгнэсэн. Байнгын хорооны тогтоолын төслийг хэлэлцэн, 77.8 хувийн саналаар дэмжжээ.
Мөн Засгийн газарт авто тээврийн хэрэгслийн албан татварын нэмэгдэл, зарцуулалтад хяналт тавих тухай чиглэл өгөхөөр тогтоолын төсөлд тусгажээ. УИХ болон Байнгын хороо нь хуулийн хүрээнд Нутгийн өөрөө удирдах байгууллагын дотоод үйл ажиллагаанд оролцох эрх байхгүй тул Засгийн газарт чиглэл өгөх тогтоолын төслийг боловсруулсан байна.
Энэ талаар УИХ-ын гишүүд дараах байр суурийг илэрхийллээ.
УИХ-ын гишүүн Н.Алтанхуяг: Хүмүүсийн ахуй, амьжиргаа, инфляц, бараа бүтээгдэхүүний үнийн хөөргөдөл хүнд хэцүү байна. Иргэдийн халаасанд бараг мөнгө үлдэхгүй байна. Гэтэл 2010 оноос юу ч өөрчлөхгүй явж байснаа гэнэт 15 жилийн дараа цочоод, Х.Нямбаатар гэдэг хүн гарч ирээд татвар гурав дахин нэмнэ гэдэг түрэмгийлэл. Би хэдэн төгрөг цуглуулж байвал ард түмэн, иргэдийн амьдрал юу ч биш гэж байгаатай адил. Цуглуулсан мөнгөөрөө бордюр солихоос өөр зүйл хийдэггүй. Түгжрэл буураад байгаа нь хаана байна. Ийм байдлаар УИХ, байнгын хороо оролцож хам хэрэгтэн болж явмааргүй байна. Засгийн газарт чиглэл өгөхгүйгээр хүчингүй болгох ёстой. Яагаад тэнгэрт гараад тасраад суучихав. Хүмүүсийнхээ амьжиргааг ер нь мэдэж байна уу.
УИХ-ын гишүүн Ж.Баясгалан: Нийслэлд 900 гаруй мянган тээврийн хэрэгсэлтэй хүмүүс байна. Үүний хэд нь санал агуулгад орсон бэ. Хоёрхон хүний саналаар иргэдийнхээ халаасыг ухах ийм шийдвэр гаргаж болохгүй. Хуулийн хүрээнд л нэмж болно.
УИХ-ын гишүүн Ж.Батжаргал: Хуулиа орон нутагт шийдэх эрх нь байгаа асуудал. Гэхдээ энэ татвар төсөвт төвлөрөөд замын бүтээн байгуулалтад чиглэдэг татвар. Тийм учраас Хууль тогтоомжийн тухай хуулийн холбогдох заалтын дагуу Засгийн газар иж бүрэн үнэлгээ хийх хэрэгтэй байна. Шаардлагатай бол шинэчлэх нь зүйтэй.
