Хөвсгөл аймгийн Тариалан сумын тавдугаар баг, “Сайхан мод” гэх газраас энэ оны есдүгээр сарын 17-ны өдөр 2 настай хүүхэд алга болж, улмаар эрэн хайх ажиллагаа өнөөдрийг хүртэл үргэлжилсэн юм. Харамсалтай нь өнөөдөр 16:00 цагийн үед хүүгийн цогцсыг алга болсон газраас 3-4 километрийн зайд олсон байна. Энэ талаар Цагдаагийн ерөнхий газраас мэдээлэл өглөө.

ЦЕГ-ын хэвлэл мэдээллийн төвийн ахлах мэргэжилтэн, хошууч С.Баярбилэг: Есдүгээр сарын 17-нд 2 настай хүү сураггүй болсон тухай дуудлага анх бүртгэгдсэн. Үүнээс хойш төрийн байгууллагууд болон иргэд, олон нийт хамтран хүүг эрэн хайх ажиллагааг өнөөдрийг хүртэл тасралтгүй зохион байгуулсан.

Харамсалтай нь өнөөдөр 16:00 цагийн орчимд, алга болсон газраас 3-4 километрийн зайд хүүгийн цогцсыг олсон. Одоогоор хэргийн газрыг хааж, мөрдөн шалгах ажиллагаа үргэлжилж байгаа бөгөөд талийгаачийн цогцсонд үзлэг, шинжилгээ хийгдэж байна.

Цагдаагийн байгууллагаас одоогоор хүүгийн үхлийн шалтгаан тодорхой болоогүй гэж мэдэгдэж байгаа бөгөөд шинжээчийн дүгнэлт гарсны дараа олон нийтэд албан ёсны мэдээлэл өгөхөө мэдэгдлээ. Ил харагдах гэмтэл, шархны талаар ч үзлэгийн үр дүнгээр нарийн мэдээлэл өгөх боломжтой юм байна. Мөн эрэн хайх ажиллагаа ямар зарчмаар явагдсан талаар одоогоор тодорхой мэдээлэл өгөөгүй бөгөөд энэ талаарх дэлгэрэнгүйг мөн дараа нь танилцуулна гэлээ.