УИХ-ын нэгдсэн чуулганаар ““Алт-3” аяныг хэрэгжүүлэх зарим арга хэмжээний тухай” Улсын Их Хурлын 2025 оны 85 дугаар тогтоолд хэсэгчлэн тавьсан Монгол Улсын Ерөнхийлөгчийн хоригийг үргэлжлүүлэн хэлэлцэж, санал хураалт явууллаа. Өчигдөр УИХ-ын нэгдсэн чуулганаар гишүүд Ерөнхийлөгчийн тавьсан хоригтой холбоотойгоор асуулт асууж, үг хэлсэн. Харин санал хураалтыг явуулаагүй. Учир нь өчигдөр Төрийн ордонд Халзан бүрэгтэйн УИХ-ын хяналтын сонсгол зохион байгуулсан учраас санал хураалтыг өнөөдөр хийхээр хойшлуулсан.

Тиймээс өнөөдрийн хуралдаанаар шууд санал хураалтыг явууллаа. УИХ-ын Төсвийн байнгын хорооны ““Алт-3” аяныг хэрэгжүүлэх зарим арга хэмжээний тухай” Улсын Их Хурлын 2025 оны 85 дугаар тогтоолд хэсэгчлэн тавьсан Монгол Улсын Ерөнхийлөгчийн хоригийг хүлээн авахыг дэмжье гэсэн саналаар санал хураалт явуулахад хуралдаанд оролцсон гишүүдийн 68.1 хувийн саналаар хоригийг хүлээн авахыг дэмжлээ. Ерөнхийлөгчийн хоригийг хүлээн авснаар УИХ баталсан тогтоолдоо өөрчлөлт оруулна гэсэн үг. Өөрөөр хэлбэл, "Алт-3" аяны хүрээнд дархан цаазат Ноён-Уул, Гутайн даваа зэрэг газарт хайгуул, олборлолт хийхгүй болно гэсэн үг юм.