Монголын боловсрол, шинжлэх ухааны Үйлдвэрчний эвлэлийн холбооноос өнөөдөр орон даяар тайван жагсаал зохион байгуулж байна. Жагсаалд нийслэлийн бүх дүүрэг болон 21 аймгийн ерөнхий боловсролын сургууль, мэргэжлийн боловсролын байгууллага, сургуулийн өмнөх боловсрол, их дээд сургууль, шинжлэх ухааны байгууллагын багш, ажилтнууд нэгдэн оролцож, өөрсдийн үзэл бодол, дуу хоолойгоо илэрхийлж байгаа юм. Мөн орон нутгаас багш нар ирж, жагсаалд нэгдсэн бөгөөд Дархан-Уул, Төв аймгаас төлөөллүүд ирсэн байна.

Энэхүү жагсаалаар багш нарын үндсэн цалинг 3.5 сая төгрөг болгон нэмэгдүүлэх, нийгмийн баталгааг сайжруулах зэрэг гол шаардлагуудыг тавьж, УИХ-ын дарга болон Ерөнхий сайдад албан ёсоор хүргүүлж байгаа юм. Багш нарын үзэж байгаагаар, цалин нэмэгдээгүйн улмаас боловсролын салбар хүний нөөцийн хомсдолд орж, хөдөлмөрийн мөлжлөг газар авч байна. Үүнээс гадна эрүүл, аюулгүй ажлын байрны нөхцөл хангалтгүй, нийгмийн баталгаа сул хэвээр байгааг тэд онцоллоо.

Жагсаалд оролцогчид сүүлийн жилүүдэд өргөн хэрэглээний бараа бүтээгдэхүүний үнэ огцом өссөн ч цалин, хөлс бараг өөрчлөгдөөгүй. 2026 оны улсын төсөвт ч цалин нэмэх зардал тусгагдаагүй нь багш ажилтнуудын амьжиргаанд хүндрэл учруулж, боловсролын салбарыг хямралд хүргэж байна хэмээн байр сууриа илэрхийлэв. Энэ талаар Монголын боловсрол, шинжлэх ухааны Үйлдвэрчний эвлэлийн холбооны дарга З.Цогтгэрэл “Боловсролын салбар доройтож, ирээдүй хойч үеийн боловсролд аюул учрах хэмжээнд хүрээд байна. Иймээс бид дуу хоолойгоо хүргэхээс өөр аргагүй болсон” гэсэн юм.

Үйлдвэрчний эвлэлийн холбооноос тооцоолсноор, багш нарын үндсэн цалинг 3.5 сая төгрөг болгоход улсын хэмжээнд 3.3 их наяд төгрөгийн нэмэлт төсөв шаардлагатай аж. Харин салбарын сайдын хэлснээр энэ хэмжээний санхүүжилтийг одоогийн нөхцөлд шийдвэрлэхэд эдийн засгийн боломж хязгаарлагдмал байна гэсэн юм.