Цаг үеийн нөхцөл байдалтай холбогдуулан УИХ-ын гишүүн М.Нарантуяа-Нара мэдээлэл өглөө.

Тэрээр "Нэг санал дэвшүүлье гэж бодож байна. УИХ-ын даргаас ажлын хэсэг байгуулж, цаазын ялыг ямар нөхцөлд сэргээж болох талаар ангилж судлах ажлын хэсэг ажиллуулах талаар юм. Ялангуяа бага насны хүүхдэд бэлгийн хүчирхийлэл үйлдсэн болон хүнийг онц хэрцгийгээр яргалан хөнөөсөн тохиолдолд цаазын ялыг сэргээдэг байх хэрэгтэй гэж үзэж байна. Харамсалтай нь АН-аас дэвшүүлсэн санаачлагын улмаас чуулганы хэлэлцүүлэг хоёр өдрийн турш хойшлогдлоо.

Хуульд заасны дагуу энэ үед төсвийг хэлэлцэж батлах нь гол ажил. Гэвч Ерөнхий сайд Занданшатар нээлтийн үгэндээ өнөөдөр нийгэмд бий болсон бодит нөхцөл байдал, тэр дундаа хүний амь насыг онц хэрцгийгээр хөнөөсөн, олон дахин гарч буй гэмт хэрэг, гэмт этгээдүүдийн асуудлыг огт дурдаагүйд иргэдийн өмнөөс харамсаж байна. Үнэндээ төсөв гэдэг нь ард түмний сайн сайхны төлөө хэлэлцэгддэг зүйл. Харин тэр сайн сайхныг хэн хүртэх вэ гэвэл эрүүл саруул амьд монгол хүн хүртэнэ. Гэтэл бид хамгийн наад захын эрдэнэт хүний амь насыг хамгаалж чадахгүй байгааг анхаарах хэрэгтэй.

3.5 сая гаруйхан хүн амтай улсад онц хэрцгий гэмт хэрэг үйлдэгчид байж, бүр цуврал аллагын шинжтэй аймшигт хэрэг гарч байгаа нь өөрөө үндэсний хэмжээний гамшиг юм. Иргэдэд мэдээж нийгэм, эдийн засаг, эрүүл мэндийн олон асуудал бий. Төсөв дээр татвар хөнгөлөх, эдийн засгийг дэмжих талаар ярих нь чухал боловч хамгийн түрүүнд юуны өмнө хүний амь насыг хамгаалах асуудлыг эрэмбэлэн дээгүүрт тавих шаардлагатай байна.