Засгийн газар 2025 оны төсвийн төслийг УИХ-д өргөн барьж, өчигдөр УИХ-ын чуулганаар эхний хэлэлцүүлгийг эхлүүлсэн. УИХ-ын чуулганы дэгийн тухай хуульд зааснаар гишүүдийн олонх улсын төсвийг холбогдох хууль, хөгжлийн төлөвлөгөөнд нийцээгүй гэж үзвэл хоёр дахь хэлэлцүүлгээс Засгийн газарт буцаах шинэ зохицуулалттай болсон. Хэрвээ төсвийн төслийг буцаасан тохиолдолд Засгийн газар гурав хоногийн дотор хуульд нийцүүлэн дахин өргөн барина.
УИХ-ын чуулганы дэгийн тухай хуулийн өөрчлөлтөөр төсвийн хэлэлцүүлэг дөрөв байсныг тав болгон нэмэгдүүлж, мөн Засгийн газарт буцаадаг зохицуулалтыг хийсэн юм.
70 дугаар зүйл. Хоёр дахь хэлэлцүүлэг
-Төсвийн төслийн хоёр дахь хэлэлцүүлгээр Төсвийн болон бусад Байнгын хороо төсвийн төсөлтэй танилцаж, хуралдаанаар хэлэлцэнэ.
-Байнгын хороо эрхлэх асуудлын хүрээнд төсвийн төслийн хэлэлцүүлэг хийсэн талаар танилцуулга боловсруулж, Төсвийн байнгын хороонд хүргүүлнэ.
-Төсвийн байнгын хороо энэ хуулийн 70.3-т заасан танилцуулгыг хүлээн авч нэгтгэн, нэгдсэн хуралдаанд танилцуулна.
-Нэгдсэн хуралдаанд Төсвийн байнгын хороо танилцуулга хийсний дараа төсвийн төсөл нь Төсвийн тухай болон Төсвийн тогтвортой байдлын тухай хуульд заасан шалгуур, дунд хугацааны төсвийн хүрээний мэдэгдлийн тусгай шаардлага, Улсын хөгжлийн жилийн төлөвлөгөөнд нийцсэн эсэх талаар санал хураалт явуулна.
-Энэ хуулийн 70.5-д заасан санал хураалтад оролцсон гишүүдийн олонх дэмжсэн бол төсвийн төслийг гурав дахь хэлэлцүүлэгт бэлтгүүлэхээр Байнгын хороод, Төсвийн зарлагын хяналтын дэд хороонд шилжүүлнэ.
-Энэ хуулийн 70.5-д заасан санал хураалтад оролцсон гишүүдийн олонх дэмжээгүй бол төсвийн төслийг ажлын 3 өдрийн дотор хуульд нийцүүлэн өргөн мэдүүлэх чиглэл өгч Засгийн газарт буцаана гэж заасан
Ерөнхий сайд Г.Занданшатар 2026 оны төсвийн төслийг боловсруулахад олон нийтийн оролцоог хангаж ажиллахыг төсвийн ерөнхийлөн захирагч нарт үүрэг болгож, олон нийтээс ч санал авч төслийн төсөлд тусгасан гэж мэдээлж буй. Гэхдээ МАН-ын намын даргын сонгуультай холбоотойгоор нам дотор хагарал үүсээд байгаа. УИХ-ын дарга Д.Амарбаясгалан МАН-ын даргад нэр дэвшихээ албан ёсоор зарлахдаа хэлсэн үгэндээ болон өчигдөр намрын чуулганыг нээхдээ төсвийн төслийг хангалтгүй болсон хэмээн хэлсэн. Үүнээс харахад УИХ-ын даргын дэмжлэггүй 2026 оны төсөв хэлэлцэгдэж эхлээд байгаа бөгөөд төслийг Засгийн газарт буцаах эрсдэлтэй байгаа юм.
Гэхдээ ирэх оны төсвийг арваннэгдүгээр сарын 15-аас өмнө батлах хуулийн хугацаатай. Төсвийн тухай хуульд ирэх оны төсвийг арваннэгдүгээр сарын 15-аас өмнө баталж чадахгүй бол УИХ тарна гэж заасан байдаг. Тиймээс МАН-ынхан хэдий дотроо хагарлаа ч төсвөө хуулийн хугацаандаа батлах нь тодорхой.
