2025 оны эхний найман сарын байдлаар Монгол Улсад нийт 600 мянган жуулчин ирсэн байна. Үүн дээр есдүгээр сарын эхнээс хойш 16 мянга гаруй хүн нэмэгдсэнээр энэ оны есдүгээр сарын эхний арав хоногийн байдлаар нийтдээ 617 мянган жуулчин Монгол Улсыг зорьжээ.

Өнгөрсөн 2024 онд манай улсад нийт 808.9 мянган жуулчин ирж, аялал жуулчлалын салбар 1.6 тэрбум ам.долларын орлого олсон нь түүхэн дээд үзүүлэлтүүдийн нэг болсон. Харин энэ онд аялал жуулчлалын байгууллагууд болон төрөөс зорилт дэвшүүлэн жуулчдын тоог 1 саяд хүргэхээр ажиллаж байгаа юм.

Зорилгодоо хүрэхийн тулд төр, хувийн хэвшлийнхэн хамтран олон улсын нэр хүндтэй инфлүүнсэрүүдийг урьж, тэдний контент болон сурталчилгаагаар дамжуулан Монголыг таниулахыг зорьж байна. Мөн Улаанбаатар хотын төв талбайд олон нийтийг хамарсан арга хэмжээнүүд зохион байгуулж, соёл, урлагийн арга хэмжээг идэвхжүүлсэн. Гэсэн хэдий ч зуны аялал жуулчлалын оргил үед ирсэн жуулчдын бодит тоо хүлээлтийг даваагүй байна.

Монгол Улс аялал жуулчлалаа хөгжүүлэхийн тулд зөвхөн сурталчилгаа бус дэд бүтэц, үйлчилгээний чанарт түлхүү анхаарах шаардлагатай талаар судлаачид онцолдог. Жуулчид Монголд ирэхдээ байгалийн өвөрмөц тогтоц, нүүдлийн соёл, түүхийн дурсгалт газруудад татагддаг ч дэд бүтцийн хомсдол, үйлчилгээний стандартын ялгаа нь сул тал болж байна. Тухайлбал, 2024 онд ирсэн жуулчдын дийлэнх нь БНХАУ, ОХУ, Өмнөд Солонгос, Япон, АНУ зэрэг орноос ирсэн бөгөөд ихэвчлэн богино хугацааны аялал хийж байна. 

Цаашид жуулчдын тоог тогтвортой өсгөхийн тулд зөвхөн зуны улиралд төвлөрөхөөс гадна өвлийн аялал жуулчлалыг хөгжүүлэх, олон улсын нислэгийн тоо, чиглэлийг нэмэгдүүлэх, хил гаалийн үйлчилгээг хялбаршуулах зэрэг бодитой алхмууд шаардлагатай болж байна. Ингэж чадвал Монгол Улс тавьсан зорилтоо биелүүлээд зогсохгүй, бүс нутгийн аялал жуулчлалын өрсөлдөөнд өөрийн байр суурийг бэхжүүлэх боломжтой юм.