Ц.Санжаачойпэл, Б.Амарсайхан, Э.Тэмүүлэн нарт зодуулсан гэх "С"-д хилийн хориг тавих эсэхийг шийдэх шүүх хурал яг одоо болж байна. Шүүх хуралд хохирогч өөрийн биеэр оролцож байгаа бөгөөд хохирогчийн аав Д.Дашзэвэг мэдээлэл өглөө.

Тэрээр "Монгол Улсын хууль шүүхийн байгууллага үнэн зөв шийдвэр гаргана гэдэгт итгэж байна. Гэвч хилийн хориг тавина гэсэн асуудал нь арай хэтэрсэн хатуу арга хэмжээ юм. Учир нь миний хүү эмч нарын зөвлөсний дагуу урт хугацаанд тогтмол хяналтад байх ёстой бөгөөд энэ сарын 15-наас эмнэлгийн үзлэгт орох цаг авсан. Мөн эмчилгээнийхээ хүрээнд гадаад руу явах шаардлагатай. Хэрэв хилийн хориг тавигдвал эмчилгээнд явах боломжгүй болж, эмчилгээний тасралтгүй байдал алдагдах эрсдэл үүснэ. Эмчилгээ нэг удаад дуусаад зогсох бус, тодорхой хугацааны дараа дахин үргэлжлүүлэх шаардлагатай байдаг тул хүү маань буцаад гадагшаа явах ёстой.

Хилийн хориг тавих талаар яллагдагч талаас гомдол гаргасан байж магадгүй. Энэ бол мөрдөн байцаалтын шатны асуудал тул хэлж мэдэхгүй байна. Шүүх арай ч ийм шийдвэр гаргахгүй байх гэж найдаж байна. Хүүгийн минь сэтгэл санаа, сэтгэл зүй маш хүнд байгаа. Гадаадад эрүүл саруул суралцаж, эх орондоо ирээд ихийг бүтээх хүсэл тэмүүлэлтэй байсан ч ийнхүү гэнэтийн хэрэгт өртсөнд сэтгэл нь маш хүнд байна.

Цаашид биед нь ямар нэгэн өөрчлөлт гарах, эсвэл гэмтлийн улмаас эрсдэл бий болох эсэх нь тодорхойгүй байна. Хүн хийсэн хэргийнхээ горыг арилгаж, хариуцлагаа үүрэх нь зүй ёсны хэрэг юм. Монгол хуультай, шүүхтэй улс тул шударга шийдвэр гаргана гэдэгт итгэлтэй байна.

Хэрэг үйлдсэн залуусын эцэг эх уучлал хүсэж, эмчилгээний зардлыг эмнэлэгт шилжүүлж өгч байгаа. Энэ тал дээр ямар нэгэн гомдол байхгүй. Ийм шударга бус хэрэг гарсан нь олон нийтийн дургүйцлийг төрүүлсэн. Хэдийгээр мөнгө, эрх мэдэлтэй байлаа ч ард иргэдийн дургүйцлийг өөрчлөх боломжгүй гэж бодож байна" гэлээ.

Нэмж дурдахад, зодуулсан гэх Д.Саяннямбууд хилийн хориг тавих прокурорын хүсэлтийг шүүх хүлээж аваагүй байна.