Энэ өвөл нийслэлийн хэмжээнд түүхий нүүрсийг бүрэн хориглож, мидлинг, хагас коксон түлш хэрэглэхээр болсон. Энэ талаар НЗД-ын орлогч А.Амартүвшин мэдээлэл өглөө.

Тэрээр "Улаанбаатар хотын хэмжээнд өнөөдрийн байдлаар 172 мянган өрх нүүрс хэрэглэж байна. Энэ тоо нь өмнөх жилүүдийн үзүүлэлттэй харьцуулахад мэдэгдэхүйц өссөн гэж хэлж болно. Хичээлийн шинэ жил эхлэхтэй зэрэгцэн дахин 15-20 мянган айл нэмэгддэг тул нийслэл нүүрсний хэрэглээнд суурилан галлагааны улирлын бэлтгэлээ хийж байгаа юм.

Өмнөх жилүүдэд сайжруулсан түлшинд олгож байсан татаасыг ашиглан энэ жил 306 мянган тонн хагас кокс, мөн 40 мянган тонн сайжруулсан түлшийг нийлүүлэхээр төлөвлөсөн. Ингэхдээ улсын болон нийслэлийн төсвөөс нэмэлт зардал гаргахгүйгээр зөвхөн өмнөх татаасын хүрээнд санхүүжилт хийсэн. Үүнээс гадна 5000 өрхийн дулаалгын ажил, хий рүү шилжүүлэх болон гэрийн дулаалга зэрэг ажлууд хийгдэж байна.

Галлагааны улирал есдүгээр сарын 15-наас эхэлнэ. Энэ өдрөөс нийслэлийн 400 борлуулалтын цэгээр сайжруулсан түлш худалдаанд гарч, аравдугаар сарын 1-нээс хагас коксын борлуулалт эхлэх юм. Энэ жил борлуулалтын цэгүүдийг зөвхөн зориулалтын газарт байрлуулж, машин зам дагуух болон явган хүний зам дээр нүүрс худалдахыг зогсоож байна.

Хагас коксыг хэрэглэснээр нийслэлийн агаарын бохирдлыг 40-45 хувиар, зохион байгуулалт сайн байвал 50 хувь хүртэл бууруулах боломжтой гэж үзэж байна. Шинжилгээ, судалгааны дүнгээр хагас кокс нь ахуйн хэрэглээнд тохиромжтой, нүүрсний боловсруулалтын хамгийн сүүлчийн шатны бүтээгдэхүүн бөгөөд хорт бодис, хүнд металл, тоосонцрыг шүүн цэвэрлэсэн гэж эрдэмтэд үзсэн. Ууталгаа савлагааг ч мөн цаасан материалаар хийж, түлшний хамт шатаах боломжтой байхаар зохион байгуулсан тул хог хаягдал үүсгэхгүй. Нэг уут хагас коксын үнэ 5000 төгрөгөөр худалдаална.

Нийслэл урт хугацаандаа нүүрсний хэрэглээг бүрэн халж, өрхүүдийг шат дараатайгаар хий, цахилгаан болон сэргээгдэх эрчим хүч рүү шилжүүлэх зорилготой байна. Энэ жилийн байдлаар 5000 өрх хий рүү шилжиж байгаа бол ирэх жилээс 50 мянган айлыг, цаашлаад 2027-2028 оны өвөл дахин 50-60 мянган айлыг хий рүү шилжүүлэхээр төлөвлөжээ. Ингэснээр нийтдээ 105 мянган өрхийг хий ашиглах нөхцөл бүрдүүлж, Улаанбаатар хот нүүрсний хэрэглээнээс гарах боломжтой болно.

Энэ шилжилтийн явцад хагас кокс түр зуурын хэрэглээ байх юм. Цаашид жилд 300 мянган тонн хагас кокс үйлдвэрлэх хүчин чадалтай үйлдвэрийг төр, хувийн хэвшлийн хамтын ажиллагаагаар байгуулах судалгаа хийгдсэн. Үйлдвэрийг 14-16 сарын хугацаанд ашиглалтад оруулж болох урьдчилсан тооцоо гарсан бөгөөд энэ бүтээгдэхүүн нь зөвхөн өрхүүд төдийгүй дулаан, цахилгааны станцуудын хэрэглээнд ч ашиглагдах юм. Ингэснээр түүхий нүүрсний хэрэглээг бүрэн халж, нийслэлийн утаа, угаарын асуудал бүрэн шийдэгдэх боломжтой гэж үзэж байна" гэлээ.