Хөвсгөл аймагт голомтод бүсээс тарвага төхөөрөн хүнсэндээ хэрэглэсэн нэг иргэн амиа алдсан билээ. Тэгвэл тухайн хүний ойрын хавьтал болох 20 хүний хариу сэжигтэй гарсан байна. Түүнчлэн, батлагдсан тохиолдол хоёроор нэмэгджээ. Тухайн иргэд Цагаан-Уул болон Мөрөн сумын эмнэлэгт хэвтэн эмчлүүлж байна. Дээрх батлагдсан гурван тохиолдлоос нийтдээ 96 хүний нэгдүгээр хавьтлыг тодорхойлж, тусгаарлаж байгаа аж. Мөн эрүүл мэндийн байгууллагын ажилтнуудаас 41, гэр бүлийн болон бусад ойрын хавьтлын 55 хүнийг тусгаарлалтад авсан талаар ЭМЯ-ны Төрийн нарийн бичгийн дарга Д.Очирбат мэдээлсэн.

Иймд Хөвсгөл аймгийн Мөрөн, Цагаан-Уул суманд энэ сарын 8-15-ны өдрийг дуустал өндөржүүлсэн бэлэн байдалд шилжүүлжээ. Ингэснээр Мөрөн, Цагаан-Уул сумын ЕБС, цэцэрлэг, сургалт, олон нийтийг хамарсан үйл ажиллагаа, үзвэр үйлчилгээ, хичээл гадуурх бүх төрлийн спорт, секцийг есдүгээр сарын 14-ний 23.00 цаг хүртэл зогсоож, цахим хэлбэрт шилжүүлсэн байна. Мөн Мөрөн, Цагаан-Уул сумаас иргэдийн гарах хөдөлгөөнийг зогсоож, зах худалдаа үйлчилгээ, баар гээд согтууруулах ундаагаар үйлчилдэг газруудын үйл ажиллагааг есдүгээр 10-ны 23 цаг хүртэл тус тус зогсоож байгаа аж.

Тарваган тахал нь уушги болон булчирхайн халдвар гэсэн хоёр хэлбэртэй байдаг. Үүнээс уушгины халдвар нь маш аюултай, хурдан тархацтай, эрсдэл ихтэй өвчлөлд тооцогддог болохыг ЭМЯ-наас анхааруулж байна.